Qozog‘iston Xalq banki O‘zbekistonda 2018-yil oxirigacha o‘z tarmog‘ini ochmoqchi

Qozog‘iston Xalq banki boshqaruv raisi Umut Shayaxmetova O‘zbekiston bozoriga chiqish rejalari haqida gapirib berdi, deb yozadi “Review.uz”.

“Yaqinda Qozog‘iston Milliy banki O‘zbekiston bilan hukumatlararo kelishuvni imzoladi, uning doirasida mahalliy banklarga ushbu mamlakatda sho‘ba vakolatxonalarini ochish imkonini beruvchi choralar ko‘rildi. Ayni paytda biz Qozog‘iston va O‘zbekiston regulyatorlariga ruxsat beruvchi hujjatlarni topshirish bosqichidamiz”, — dedi u.

Xalq banki boshqaruv raisi bank tarmog‘i 2018-yil oxirigacha ochilishini ma’lum qildi.

“Albatta, Qozog‘iston O‘zbekistondan ko‘ra ancha rivojlanganroq. Ammo bu mamlakatda ulkan potensial mavjud. Birinchi navbatda, bu aholi soni. Ikkinchi navbatda, bu davlatda moliya bozori qayta tug‘ilish bosqichida turibdi, shu sababli aktivlar, daromadlar, mijozlar va biznesning o‘zini yiliga yuz foizlab o‘stirish imkoniyati bor. Shu sababli biz bu bozorga juda optimistik nazar bilan qaraymiz”, — dedi u.