Мудофаа вазирлиги марказий аппаратида IV Халқаро армия ўйинлари совриндорларини тақдирлашга бағишланган маросим бўлиб ўтди. Бу ҳақда вазирлик матбуот хизмати «Дарё»га маълум қилди.
Ўзбекистонлик ҳарбий хизматчилар бу йил ўз натижаларини сезиларли даражада кўтариб, умумжамоа ҳисобида 6 ўринни эгаллади. Таъкидлаш керакки, «АрМИ—2018» мусобақаси 28 йўналиш бўйича ўтказилган бўлиб, унда дунёнинг 32 мамлакатидан келган ҳарбийлар иштирок этди. Шу боис ҳам мазкур мусобақани «ҳарбий профессионаллар беллашуви» деб аташди.
Мудофаа вазирлиги ҳарбий хизматчилари бу сафар 12 йўналишда қатнашиб, 6 та совринли ўринларни қўлга киритди. Ўзбекистонлик ҳарбийлар «Қўшин разведкаси аълочилари», «Мерганлик марраси» ва Содиқ дўст» каби йўналишларда рекорд натижаларни қайд этди.
Тақдирлаш маросимида Ўзбекистон мудофаа вазири Абдусалом Азизов ҳам иштирок этиб, совриндорларни қўлга киритилган натижалар билан қутлади ва уларга эсдалик совғалари ҳамда пул мукофотларини топширди. Тадбирнинг расмий маросими якунлангач, Халқаро армия ўйинлари иштирокчилари учун байрам дастурхони ёзилиб, улар шарафига дилнавоз куй-қўшиқлар ижро этилди.
Изоҳ (0)