Ўзбекистонда янги ўқув йилининг бошланиши муносабати билан,«Ўзстандарт» агентлиги ҳамда «Оила даврасида» ижтимоий-сиёсий, маънавий-маърифий газетаси ҳамкорлигида пойтахтнинг айрим бозорларида сотилаётган дафтарлардан намуналар танлаб олиниб, уларнинг давлат стандартларига қанчалик мос келиши таҳлил қилинганда бир қатор нуқсонлар борлиги маълум бўлди. Бу ҳақда агентлик матбуот хизмати хабар берди.
Жумладан, Ўзбекистонда ишлаб чиқарилган, ҳамда қўшни давлатлардан келтирилган ва ички бозорда сотилаётган 12 варақли катак дафтарлар, бир ва икки чизиқли дафтарлардан намуналар олиниб, меъёрий ҳужжатларда белгиланган талабларга мувофиқлиги юзасидан Республика синов ва сертификатлаштириш марказининг синов лабораториялар мажмуасида синов жараёнлари ўтказилди.
Синовлар натижалари кўнгилдагидек чиқмади. Масалан, танланган намуналар «Ўқув муассасалари учун полиграфия маҳсулотларининг хавфсизлиги бўйича умумий техник регламент» ҳамда ЎзДСт 2851:2014 меъёрий ҳужжатида қўйилган айрим талабларга мос эмаслиги кўзга ташланди.
Мактаб дафтарларининг стандарт талабларига мос келмаслиги ўқувчилар учун қатор ноқулайликларга сабаб бўлади. Қоғоз зичлигининг меъёрий ҳужжат талабларидан паст чиқиши дафтар варақларининг четлари букланишига, сиёҳларнинг орқа варақларига ўтишига ва варақларнинг тез йиртилиб кетишига олиб келади.
Дафтар чизиқларининг ранглари ва қалинлигининг меъёрий ҳужжат талабларига мос эмаслиги эса ўқувчиларнинг кўриш қобилияти зўриқишига олиб келиши мумкин. Бу номувофиқликлар ушбу маҳсулотларнинг сифат ва чидамлилик кўрсаткичлари паст даражада эканлигини билдиради.
Айниқса ёзишни ўрганаётган бошланғич синф ўқувчиларининг ҳуснихатига салбий таъсир кўрсатади. Буни билган харидорлар ҳам бу каби маҳсулотларни четга суриб, сифатли ўқув қуролларини харид қилади.
Хулоса қилиб айтганда меъёрий ҳужжат талабларига мос, сифатли ва харидоргир маҳсулотларни ишлаб чиқариш биринчи навбатда тадбиркорларнинг ўзлари учун фойдалидир, дейилади хабарда.
Изоҳ (0)