Ўзбекистон Президенти Шавкат Мирзиёев 10 август куни Шайхонтоҳур тумани фаоллари билан учрашган эди. Учрашув давомида Давлат раҳбари Тошкент ҳар жиҳатдан бутун Ўзбекистонга ўрнак шаҳар бўлиши лозимлигини таъкидлади. Айни вақтда, фаолларни, раҳбарларни юрт, халқ равнақи йўлида садоқат билан меҳнат қилишга чақирди.
Мени битта ниятим — Тошкент, пойтахтимиз ўзига муносиб ўрнини эгаллаши керак. Қоғозда эмас, ҳисоботда эмас, кўз-кўз қилиш учун эмас, амалда. Ҳавоси ҳам, муҳити ҳам, адолатлиги ҳам, ватанпарварлиги ҳам мана шундай катта давлатимизга ўрнак бўлиши керак. Дўст ачитиб гапиради. Нимага десангиз, Шайхонтоҳур туманининг тарихи жуда улуғ.Сизлар туманингизга муносиб бўлишингиз керак. Ҳар бир маҳалланинг раиси илмли бўлиши керак. Ўзимизга ўзимиз кўп-кўп муаммолар туғдирганимиз рост, қонунларимиз ишламагани рост. Адолатсизлик, бюрократия, коррупция — бу рост гаплар. Мени ким алдай олади — мен пастда юрган одамман. Вақт энг катта ҳакам. Лекин шу вақтни ютқазсак, бизга ҳеч ким ишонмайди.
Энг катта хавф дунёда — ички душман. Ким ички душман? Бефарқ одам! Худо бефарқликдан сақласин. Худо таоло ўша бефарқ одамга ҳам инсоф бериб, ўзининг, фарзандларининг эртанги кунини фаровон қилишга белини маҳкам боғлаб ишласа, албатта натижа бўлади. Сизлар ишонинглар, биз тўғри йўлдамиз. Шу ниятни амалга ошириш учун сизлар елкадош бўлиб, бугунги гаплардан хулоса қилсаларинг, албатта натижа бўлади.
Худо таоло ҳамма нарсани кўриб, юртга, халқига садоқат билан меҳнат қилган раҳбарларга ўзининг барокатини ҳар вақт беради. Шунга инонсак, шунга ишонтиролсак, муваффақият бизники. Ватанининг камолини кўришдан ортиқ бахт йўқ ўзи бу дунёда. Мен шу нарсаларнинг ҳаммасини ҳамроҳликда, биргаликда кўришимиз насиб эцин, деб сизлар билан хайрлашаман. Соғ бўлинглар!
Шавкат Мирзиёев, Ўзбекистон Президенти
Изоҳ (0)