Ўзбекистон Республикаси Президентининг «Ўзбек миллий мақом санъатини янада ривожлантириш чора-тадбирлари тўғрисида» 2017 йил 17 ноябрдаги ПҚ-3391 сонли ҳамда 2018 йил 6 апрелдаги «Халқаро мақом санъати анжуманини ўтказиш тўғрисида»ги ПҚ-3656-сонли қарорларига асосан Шаҳрисабз шаҳрида жорий йилнинг 6—10 сентябрь кунлари «Халқаро мақом санъати анжумани» ўтказилади. Бу ҳақда Маданият вазирлиги матбуот хизмати хабар берди.
Айни пайтда анжуманга тайёргарлик жараёнлари қизғин тус олган. Жумладан, миллийликни ўзида акс эттирувчи либослар, актёрлар жойлашуви ва ҳудуд атрофида уларнинг юришларини ташкил этиш, Оқсарой ҳудудидаги майдонларни ҳудудлар кесимида тақсимлаш, Қорақалпоғистон Республикаси Маданият вазирлиги, вилоятлар маданият бошқармалари ва Тошкент шаҳар маданият бош бошқармаси томонидан анжуманда иштирок этиш учун худудий ижодий-ишчи гуруҳларни тузиб, ўз ҳудудига хос бўлган миллий урф-одатлари, анъана ва қадриятлари акс этган сценарий ва дастурлар лойиҳаларини ишлаб чиқиш ва унга асосан мусиқий кетма-кетлик ва видеороликларини тайёрлаш каби бир қатор вазифаларни белгиланган муддатларда амалга ошириш устида иш олиб борилмоқда.Анжуманнинг рамзий белгиси тасдиқланди, анжуман совриндорларига топшириладиган диплом, сертификат лойиҳалари, статуэтка намуналарини ишлаб чиқилиб, тасдиқлаш учун Ташкилий қўмитага киритилди.Анжуман учун мақом санъати ҳақида маълумотларга асосланган «Мақом нима?» китоби (3 та тилда — ўзбек, рус, инглиз) яратилди ва нашрга тайёрланмоқда.
Эслатиб ўтамиз, 6–10 сентябрь кунлари Шаҳрисабз шаҳрида ҳар икки йилда бир марта ўтказилиши белгиланган. Халқаро мақом санъати анжумани биринчи марта ўтказилади. Матбуот маркази фаолиятини тезкорлик билан ташкил қилиш, ОАВни анжуман ва мавзуга оид материаллар билан таъминлаб бориш мақсадида анжуманнинг www.maqomfourm.uz расмий сайти, Telegram ижтимоий тармоғида Press Centre Maqom гуруҳи ташкил этилгани ҳақида маълумот берган эдик.
Изоҳ (0)