Ўзбекистон Республикаси давлат мустақиллигининг йигирма етти йиллиги байрами арафасида Самарқанд вилояти божхона бошқармаси ташаббуси билан «Иймон бут бўлса – коррупцияга ўрин йўқ» шиори остида Самарқанд вилоят мусиқали ва драма театрида маънавий-маърифий тадбир ўтказилди. Тадбирда вилоят прокуратураси, вилоят божхона бошқармаси раҳбарияти, Олий ҳарбий божхона институти курсантлари, янги ишга қабул қилинган ёш божхона ходимлари, уларнинг ота-оналари ва яқинлари ҳамда ОАВлари вакиллари иштирок этишди. Бу ҳақида «Дарё» мухбири Фарҳод Норбўтаев хабар бермоқда.
Давлатимиз мустақиллигини асраб-авайлаш, коррупцияга қарши курашиш бўйича давлат сиёсатини қўллаб-қувватлаш, божхона тизимида коррупциянинг олдини олиш, ходимлар ўртасида соғлом муҳитни яратиш ва ёш божхоначиларни маънавий жиҳатдан ўқувини ошириш мақсадида ташкил этилган тадбирни Самарқанд вилояти божхона бошқармаси бошлиғининг биринчи ўринбосари Ш.Салихов кириш сўзи билан очиб берди.
Тадбирда «Коррупцияга қарши курашиш тўғрисида»ги Қонуннинг 30-моддасига асосан божхона ходимлари ўртасида социологик сўровлар ўтказилиб келинаётганлиги таъкидлаб ўтилди. Ўтказилган сўровлар таҳлил қилиниб, аниқланган камчиликларни бартараф этиш ҳамда берилган таклифларни ўрганиб чиқиш мақсадида Давлат божхона қўмитасига ва бошқа мутасадди ташкилотларга маълумотлар тақдим этилмоқда.
Самарқанд вилояти божхона бошқармаси ахборот хизмати берган маълумотга кўра, ҳозирда божхона ходимининг ўртача иш ҳақи миқдори 3 174 678 минг сўмни ташкил этмоқда. Бу эса 2012 йилга нисбатан 4,5 баробарга кўп демакдир. Келгусида ҳукумат божхона органи ходимларини ойлик маошини янада оширишни кўзда тутган. Бошқа вилоятлардан Самарқандга келиб хизмат қилаётган ходимларга 22 та хизмат уйлари ажратилган.
Изоҳ (0)