Ўзбекистон истеъмолчилар ҳуқуқларини ҳимоя қилиш жамиятлари федерацияси Қорақалпоғистон Республикаси, вилоятлар ҳамда Тошкент шаҳри марказий бозорларида сотилаётган озиқ-овқат, ноозиқ овқат ва қишлоқ хўжалик маҳсулотлари нархларининг бугунги кундаги ҳолатини эълон қилди.
Мамлакат бозорларида 1 килограмм мол гўшти 26 минг сўмдан 43 минг сўмгача бўлган нархларда сотилмоқда. Энг арзон нархларни Қорақалпоғистон Республикаси бозорларида учратиш мумкин — 26 минг сўм.
Нукус шаҳар Марказий деҳқон бозорида 1 килограмм мол гўшти 26 — 39 500 сўм. Ўтган ҳафтада ушбу бозорда 1 килограмм мол гўшти 26 — 42 минг сўмдан сотилаётгани кузатилганди.
Тошкент шаҳрининг «Фарҳод», «Миробод», «Юнусобод», «Чорсу», «Қўйлиқ» деҳқон бозорларида 1 килограмм мол гўшти 28 минг сўмдан 42 минг сўмгача сотилмоқда. Ўтган ҳафтада энг арзон нархлардаги мол гўшти фақат «Қўйлиқ» бозорида (28 минг сўм) сотилган бўлса, эндиликда ушбу нархлардаги мол гўштини барча бозорлардан сотиб олиш мумкин.
Қизиғи, республика бўйича энг қиммат нархларда сотилаётган мол гўшти бу ҳафтада «Қўйлиқ» деҳқон бозорида учради. «Миробод» бозорида 42 минг, «Юнусобод» бозорида 41 минг, «Фарҳод» бозорида 40 минг, «Чорсу» бозорида 39 мингга сотилаётган шу сифатдаги 1 килограмм мол гўшти «Қўйлиқ» бозорида 43 минг.
Энг арзон нархлардаги қўй гўшти пойтахтнинг «Миробод», «Фарҳод», «Чорсу» бозорларида 28 минг сўмдан сотилмоқда. Энг қиммат нархлардаги қўй гўштини ҳам Тошкент шаҳар бозорларида учратиш мумкин: «Юнусобод» бозорида 44 минг сўм, «Қўйлиқ» бозорида 45 минг сўм.
Энг арзон нархдаги товуқ гўшти Наманган шаҳрининг «Сардоба» деҳқон бозорида — 12-14 минг сўм. Энг қиммат нархлар Тошкентнинг «Фарҳод» деҳқон бозорида — 14-21 минг сўмгача.
Изоҳ (0)