Арманистон собиқ президенти Роберт Кочарян ҳибсдан озод қилинди, деб ёзади «Вести.ru».
Роберт Кочарян 2008 йил 1 март намойишларини бостириш иши бўйича 2018 йил 27 июль куни 2 ойга қамоққа олинган эди. Ереваннинг биринчи инстанция суди Арманистон махсус тергов хизматининг Роберт Кочарянни ҳибсга олиш ҳақидаги даъвосини қондирган эди. 13 август куни эса Апелляция суди ушбу қарорни собиқ давлат раҳбари конституциявий дахлсизликка эга эканлиги асосида бекор қилди.
Арманистон бош прокуратураси Апелляция суди қарори устидан шикоят аризаси бериш имкониятини ўрганади. Хусусан, Арманистон Кассация судига мурожаат қилиниши мумкин.
Эслатиб ўтамиз, Роберт Кочарян (1998—2008 йилларда Арманистон президенти) конституцион тузумни ағдаришда айбланмоқда. Арманистон собиқ етакчисига 2008 йил 1 март куни бўлиб ўтган президентлик сайловларидан кейинги намойишларни бостириш иши бўйича айб қўйилган. Шу пайтга қадар Кочарян тергов ишида фақатгина гувоҳ сифатида қатнашган.
Изоҳ (0)