Усама бин Ладеннинг онаси ва ўгай укалари «Ал-Қоида» асосчисининг ўғилларидан бири ушбу террорчилик ташкилотининг 2001 йил 11 сентябрда АҚШда тўртта самолётни қўлга олишда иштирок этган аъзоси — Муҳаммад Аттанинг қизига уйлангани ҳақида гапириб берди. Бу ҳақда улар The Guardian журналисти Мартин Чуловга интервью чоғида маълум қилди, деб ёзади Meduza.
Ҳамза бин Ладен — Усама бин Ладеннинг 25 га яқин фарзандлари ичида энг кенжаси. Унинг онаси Ладеннинг учинчи хотини бўлиб, у билан 2011 йил Америка махсус операцияси чоғида ўлдирилган Абботобод (Покистон) шаҳрида бирга яшаган.
2014 йилда Ҳамза «Ал-Қоида» таркибига кирган, уч йилдан сўнг АҚШ уни мамлакат хавфсизлигига таҳдид солувчи терактларни амалга оширишга уринганликда айблаб, халқаро террорчилар рўйхатига киритди. 2017 йил майида Ариана Гранденинг Манчестердаги концерти чоғида портлаш юз беришидан ўн кун аввал, «Ал-Қоида» Ҳамза бин Ладеннинг терактларга даъват қилувчи гапларидан иборат аудиоёзувни тарқатган эди.
Ҳамза бин Ладеннинг рафиқаси ҳақида ҳеч нарса, ҳатто унинг исми ҳам маълум эмас. Унинг отаси, мисрлик Муҳаммад Атта АҚШда 2001 йил 11 сентябрда тўртта йўловче лайнерини қўлга олиб, уларни Нью-Йоркдаги Жаҳон савдо маркази ва Вашингтондаги Пентагон биноларига бориб урган 19 нафар худкушдан бири бўлган. Атта ҳамтовоқлари билан Бостондан Лос-Анжелесга учаётган самолётни эгаллаб олган. Муҳаммад Атта ҳеч қачон уйланмаган ва фарзандлари бўлмаган, деб ҳисобланилган; унинг қизи борлиги ҳақидаги маълумот кутилмаган янгилик бўлди.
The Guardian ёзишича, Ҳамза бин Ладен ҳамда Муҳаммад Аттанинг қизи ўртасидаги никоҳ Усама бин Ладен ва 11 сентябрь терактлари ташкилотчилари ўлимидан кейин ҳам «Ал-Қоида» тузилмасида асосий шахслар бўлиб қолаётганини тасдиқлайди.
Изоҳ (0)