Олтиариқ туман тиббиёт бирлашмасига қарашли Полосон шаҳарчасидаги тез тиббий ёрдам бригадаси шифокори Шуҳрат Сирожиддинов 3 август куни чақирувга борган вақтида калтакланди. Бу ҳақда «Дарё» мухбири Азизжон Эрматов хабар бермоқда.
Олтиариқ туман тиббиёт бирлашмаси бош шифокор ўринбосарининг айтишича, бригада навбатчи шифокори Ш. Сирожиддинов чақирув бўлган Мозортаги маҳалласидаги 50-уйга 10 дақиқа атрофида етиб борган. Бу вақтда 70 ёшли бемор вафот этганди. Беморнинг набираси шифокорни кеч келганликда айблаб, бошига қаттиқ зарба берган. Зарба натижасида шифокор бир муддат ҳушини йўқотган.
Айни пайтда Ш. Сирожиддинов шошилинч тиббий ёрдам бўлимида мия чайқалиши ва қулоқ пардасига жиддий шикаст етишидан даволанмоқда.
Жабрланувчи суд тиббий экспертизаси текширувидан ўтказилди. Экспертиза хулосаси асосида кейинги чоралар кўрилади.
Ҳолат бўйича ҳудуд профилактика инспектори дастлабки тергов-суриштирув ишларини олиб бормоқда.
Маълумот учун, Ш. Сирожиддинов 2016 йилда Соғлиқни сақлаш вазирлиги томонидан ўтказилган танловда «Тез тиббий ёрдам станциясининг энг малакали шифокори» номинациясида 1-ўринга лойиқ кўрилганди.
Изоҳ (0)