Шайх Муҳаммад Содиқ Муҳаммад Юсуф номидаги масжид қурилиши жадаллик билан давом этмоқда (фотогалерея)

Жорий йилнинг 9 февраль куни Ўзбекистон раҳбари Шавкат Мирзиёев ташаббуси билан Чилонзор туманида янги масжид қуриш ва унга шайх Муҳаммад Содиқ Муҳаммад Юсуф номини бериш ҳақида оммавий ахборот воситалари ва ижтимоий тармоқларда хабар берилган эди. Бугун масжидда қурилиш ишлари жадаллик билан давом этмоқда, деб ёзади «Islom.uz».

Лойиҳага кўра, масжид ҳудуди намозхона, аёллар намозхонаси, таҳорат хоналари, минора, 3 та кириш пештоқи, «Сўгалли Ота» мақбараси, анжуманлар саройи, ташқи ва ички фавворалар, масжид саҳни, автоуловлар учун тўхташ жойи ва ҳ.к.лардан иборат. Умумий ер майдони – 21180,0 м².

Шунингдек, давлат раҳбари ушбу ҳудудга февраль ойидаги ташрифи чоғида масжид ёнида музей бунёд этиш ва у ерда шайх ҳазратларининг умр йўлига оид қимматли маълумотлар, уларнинг илмий меросини жамлаш лозимлигини таъкидлаб ўтган эди.

Ҳудудда ўзгача чирой бахш этувчи Анжуманлар саройи, лойиҳага кўра 200 ўринга мўлжалланган бўлиб, умумий майдони 591,4 м² ташкил этади.

Мазкур йирик иншоотнинг лойиҳачиси Karatprojekt ташкилотидир.