Жорий йилнинг октябрь ойида Аргентинанинг Буэнос-Айрес шаҳрида III ёзги ўсмирлар Олимпия ўйинлари бўлиб ўтади. Ўзбекистон спорт делегацияси мусобақага жиддий тайёргарлик кўрмоқда, деб ёзади МОҚ матбуот хизмати.
Хабарда қайд этилишича, Халқаро дзюдо федерациясининг кадетлар ўртасидаги рейтинг мусобақалари якуний рўйхати эълон қилинди.
Унга кўра ўғил болалар ўртасида -66 кг вазн тоифасида Ўзбекистон шарафини ҳимоя қилган Жайҳунбек Назаров, қизлар ўртасида эса -52 кг вазн тоифасида баҳсларда қатнашган Нилуфар Ермагембетова якуний рейтингга кўра ўсмирлар Олимпиадасида иштирок этадиган бўлди.
Таъкидланишича, рейтинг мусобақаларида қатнашган беш нафар ўзбекистонлик ёш дзюдочи Олимпия ўйинлари меъёрини бажарган, бироқ қоидага кўра бир мамлакатдан кўпи билан икки нафар дзюдочи ўсмирлар Олимпиадасида иштирок этиши мумкин. Ўзбекистон дзюдо федерацияси қарорига кўра айнан Жайҳунбек Назаров ва Нилуфар Ермагамбетова Аргентинадаги мусобақада иштирок этиш учун танлаб олинди.
Шу тариқа Ўзбекистон спорт делегациясининг Буэнос-Айрес Олимпиадаси учун лицензиялари сони 33 тага етди.
Бугунги кунга келиб III ёзги ўсмирлар Олимпия ўйинлари учун Ўзбекистон терма жамоаси ҳисобида қуйидаги спорт турларида лицензиялар мавжуд:
- Спорт курашлари – 5 та
- Енгил атлетика – 4 та
- Бокс – 3 та
- Оғир атлетика – 3 та
- Байдарка ва каноэда эшкак эшиш – 3 та
- Академик эшкак эшиш – 3 та
- Спорт гимнастикаси – 2 та
- Спорт акробатикаси – 2 та
- Дзюдо – 2 та
- Трамполин – 1 та
- Бадиий гимнастика – 1 та
- От спорти (конкур) – 1 та
- Таэквондо – 1 та
- Карате – 1
- Ўқ отиш – 1
Изоҳ (0)