Аргентиналик футбол мутахассиси Эктор Купер расман Ўзбекистон миллий терма жамоасининг бош мураббийи этиб тайинланди. Бу ҳақда ЎФА матбуот хизмати маълум қилди.
Ўзбекистон футбол ассоциацияси мамлакат бош жамоасини ишониб топшириш мумкин бўлган мутахассис билан ва ниҳоят музокараларни якунлади. ЎФА расмийлари шартнома имзолаш мумкин бўлган 10 дан зиёд номзодлар орасидан аргентиналик Эктор Купер вариантида тўхталди.
Мамлакат миллий терма жамоасининг таклифини қабул қилган Купер кеча, 1 август куни хабар қилинганидек, 6 август санасида Миллий олимпия қўмитасининг анжуманлар залида соат 15:00 да футбол мухлисларига таништирилади. Шундан сўнг у билан матбуот анжумани ташкил этилади. Анжуманда барча турдаги ОАВ иштирок этиши мумкин.
Маълумот учун Эктор Купернинг сўнгги жамоаси Миср терма жамоаси эди. 62 ёшли мутахассис мисрликлар билан ЖЧ—2018 даги муваффақиятсиз иштирокдан сўнг истеъфога чиқарилди.
Бунга қадар аргентиналик мураббий Аргентинанинг «Уракан», «Ланус», Испаниянинг «Мальорка», «Валенсия», «Реал Бетис», «Расинг», Италиянинг «Интер», «Парма», Туркиянинг «Ўрдуспор», Грециянинг «Арис», БААнинг «Ал-Васл» клубларида, Грузия (2008-2009) терма жамоасида ҳам фаолият олиб борган.
Изоҳ (0)