Аргентиналик футбол мутахассиси Эктор Купер расман Ўзбекистон миллий терма жамоасининг бош мураббийи этиб тайинлангани ҳақида бироз аввал хабар берилган эди.
Купер 6 август санасида Миллий олимпия қўмитасининг анжуманлар залида соат 15:00 да футбол мухлисларига таништирилади. Шундан сўнг у билан матбуот анжумани ташкил этилади. Анжуманда барча турдаги ОАВ иштирок этиши мумкин.
Миллий терма жамоа янги мураббийга эга бўлгач, Ўзбекистон футбол ассоциацияси биринчи вице-президенти Умид Аҳмаджонов мухлисларга мурожаат йўллади.
«Купер билан яхши ниятлар ҳамда жиддий мақсадлар йўлида келишувга эришдик. Умид қиламизки, миллионлаб ватандошларимизнинг узоқ йиллик орзуларини рўёбга чиқаришда бу инсон бизга ёрдам беради. Биз Европа футболи нафасини Ўзбекистонга олиб кира оладиган, ўз футболчиларига қаҳрамонлик ҳисларини сингдира оладиган, жамоалари ҳар қандай рақибга тик қарай оладиган, энг муҳими, Жаҳон Чемпионати сари йўлни босиб ўтган тажрибали мураббийни истагандик. Бизнингча, Купер бу талабларга мос келади. Мана шундай мутахассиснинг олиб келиниши учун шароит яратиб бераётган Ўзбекистон ҳукуматига ҳамда янги бош мураббийни сабр билан кута олган халқимизга миннатдорчилик билдираман», — деди Умид Аҳмаджонов.
Изоҳ (0)