Самарқанд шаҳридаги 4-сонли туғуриқ мажмуасида 23 май куни кўзи ёриган 1993 йилда туғилган Гўзал Ҳакимованинг фарзанди қиз туғилиб, кейинчалик ўғил фарзандли бўлиб қолганлиги тўғрисида хабар берган эдик.
Ушбу ҳолат юзасидан «Kun.uz» сайтида Самарқанд шаҳридаги вилоят перинатал марказида қиз фарзанд дунёга келтирган онага уч кун ўтиб ўғил чақалоқнинг жасади бериш сабаблари баён этилган хабар чиқарилди.
Унда маълум бўлишича, туғуруқни қайд этиш журналида доя Барно Эргашева томонидан чақалоқнинг жинси қиз бола эканлиги ёзиб қўйилган. Англашилмовчиликнинг асл сабаби шу.
«Дарё» мухбири Фарҳод Норбўтаев вилоят перинатал маркази директори Бахтиёр Жумановдан ушбу икки ҳолат бўйича (Самарқандда чақалоқлар ўлимига қачон барҳам берилади? сарлавҳали мақолада 2018 йилнинг 24 июль куни Самарқанд шаҳридаги 4-туғуриқ мажмуасида ургутлик Саодат Хайруллаева иккинчи фарзандини дунёга келтираётган вақтда ўзи ва фарзанди вафот этгани ҳақида хабар берилган эди) маълумот олиш мақсадида учрашди.
Вилоят перинатал маркази директори Бахтиёр Жуманов «Дарё»да эълон қилинган икки ҳолат бўйича қуйидаги фикрларни билдириб ўтди.
«Қиз фарзандни ўғилга айланиб қолган ҳолат бўйича ҳозирда Соғлиқни сақлаш вазирлиги томонидан босқичма босқич хизмат текшируви ўтказиш учун келяпти. Бу ҳақида маълумотларни хизмат текширувидан сўнг берамиз. Бу ҳолат мутахассисларнинг хулосасидан сўнг берилса мақсадга мувофиқ бўларди. Иккинчи масалага келсак, бу борада ҳам прокуратура текширув олиб боряпти. Бу ҳолат бўйича ҳам прокуратура хулосасидан сўнг маълумот берамиз», — дея таъкидлаб ўтди Бахтиёр Жуманов.
Маълумот учун, Самарқанд вилоят перинатал марказидаги воқеага Ўзбекистон Республикаси Соғлиқни сақлаш вазирлиги зудлик билан ўз расмий муносабатини билдирган.
Вазир ўринбосари Элмира Боситхонова мазкур вазият юзасидан ўз муносабатини қуйидагича баён этган:
«Самарқанд вилоят перинатал марказида рўй берган мазкур ҳодиса, албатта, кишини ўйга толдирмасдан қолмайди. Тиббиёт ходимларнинг қўпол хатога йўл қўйиши, эътиборсизлиги турли шубҳа ва гумонларнинг урчишига сабаб бўлади», — деди соғлиқни сақлаш вазири ўринбосари.
Элмира Боситхонованинг билдиришича, Соғлиқни сақлаш вазирининг биринчи ўринбосари Баҳодир Юсупалиев бошчилигида гуруҳ хизмат текшируви ўтказиш учун Самарқанд шаҳрига жўнаб кетган.
Қизиқ томони шундаки, вазир ўринбосари Элмира Боситхонова фақат аввалига қиз, ўлгандан сўнг ўғил болага айланиб қолган чақалоқ юзасидан фикр билдирган.
Самарқанд шаҳридаги 4-сонли туғриқхонада 2018 йилнинг 24 июль куни ургутлик Саодат Хайруллаева иккинчи фарзандини дунёга келтираётган вақтда ҳам ўзи ҳам фарзандининг вафот этганлиги юзасидан ҳеч қандай фикр билдирмаган.
Изоҳ (0)