Тошкент циркида йўлбарс ва шер маймунни еб қўйгани ҳақидаги хабарлар рад этилди

Тошкент давлат циркида йўлбарс ва шер маймунни еб қўйгани ҳақидаги хабарлар уйдирма. Бу ҳақда цирк ходими маълум қилди, дея хабар беради Sputnik.

Олдинроқ ОАВларда Тошкент давлат циркида шер ва йўлбарс очликдан «Рижик» лақабли маймунни еб қўйгани ҳақида маълумотлар тарқалган эди.

Цирк ходимларидан бирининг таъкидига кўра, маймун йўлбарс ва шер турган хонада алоҳида катакда сақланган бўлган.

«Бу туҳмат. Шер ёки йўлбарс маймунни еб қўйган бўлса, жониворнинг ҳеч бўлмаганда думи катакда қолар эди. Бу Азамат Хусиновнинг (ҳайвон ўргатувчи) уйдирмасидан бўлак ҳеч вақо эмас», — деди цирк вакили нашр мухбирининг ушбу ҳолат юзасидан мурожаатига жавобан.

Цирк ходимининг сўзларига кўра, Хусинов маймунни йиртқичлар еб қўйгани ҳақида аризани яқинда берган. Энг қизиғи, у ўз аризасида маймун бир ой олдин йиртқичларга ем бўлганини баён этган.

«Бир ой олдин шер ва йўлбар маймунни еб қўйганмиш. Нега у ўша вақтнинг ўзидаёқ бу ҳақда маълум қилмади? Бир ой нимани кутди? Ахир циркда кечаю-кундуз одам бўлса», — дея ўз таажжубини яширмайди суҳбатдош.

Цирк ходимининг сўзларига кўра, ҳайвон ўргатувчи айни вақтда циркда ўз фаолиятини давом эттирмоқда. Аммо йиртқичларга яқинлашмаяпти.

«Умуман, бундай хабардан кейин биз йиғилиш ўтказдик. Гарчи маймунни йиртқичлар еб қўйгани исботсиз ҳолат бўлса-да, ушбу ҳолатга ойдинлик киритиш учун ветеринарлар ва врачлар йиртқичларни кўрикдан ўтказиш, уларнинг қонини текшириш билан шуғулланмоқда», — дейди у.

Цирк ходимининг маълум қилишича, агар йиртқичлар маймунни еб қўйгани ўз исботини топгудек бўлса, ҳайвонлар Тошкент ҳайвонот боғига жўнатилади. Аммо бу ҳолатни олдин исботлаш керак.