2018 йилнинг биринчи ярим йиллигида жиноят ишлари бўйича судлар томонидан 26 минг 442 нафар шахсга нисбатан 20 минг 283 иш кўриб чиқилди. Бу ҳақда Олий суд расмий вакили Азиз Обидов маълум қилди, дея хабар беради ЎзА.
Мазкур ишлар доирасида 375 шахс оқланди ва реабилитация қилинди. Судланган шахслар сони 19 минг 683 нафарни ташкил этди. Шундан 4 минг 828 шахсга озодликдан маҳрум қилиш ва 13 минг 657 нафарига бошқа турдаги жазолар тайинланди. 1 минг 198 шахс шартли ҳукм қилинди.
Шунингдек, 1 минг 770 шахс озодликдан маҳрум этиш билан боғлиқ бўлмаган жазолар тайинланиши муносабати билан суд залидан озод қилинди. 15 минг 504 нафари жазони ўташ муддатидан илгари шартли озод қилинди. 4 минг 791 нафарига тайинланган жазо енгили билан алмаштирилди. 4 минг 101 шахсга нисбатан дастлабки тергов органлари томонидан асоссиз равишда қўйилган моддалар айбловдан чиқариб ташланди ёки қайта малакаланди.
Ҳисобот даврида ярашув институтининг самарали қўлланилиши натижасида 4 минг 634 шахс жиноий жавобгарликдан озод этилди.
Етказилган 196,1 миллиард сўмдан зиёд моддий зарарнинг ўрнини қоплаган 2 минг 226 шахсга нисбатан озодликдан маҳрум қилиш билан боғлиқ бўлмаган жазо тайинланган.
9 мингдан зиёд жиноят иши, яъни барча ишларнинг қарийб 45 фоизи сайёр суд мажлисларида кўриб чиқилди.
Жиноят судларида кўрилган ишлар таҳлилига назар ташланса, жорий йилнинг дастлабки ярим йиллигида пора олиш ва бериш, бу жараёнда воситачилик қилиш жинояти камайгани кузатилган.
Ўтган йилнинг шу даврига нисбатан босқинчилик, талончилик, ўзлаштириш ёки растрата йўли билан талон-торож қилиш, ўғрилик каби жиноятлар ҳам камайган. Бундан ташқари, безорилик, гиёҳвандлик воситалари ёки психотроп моддалар билан қонунга хилоф равишда муомала қилиш, транспорт воситасини олиб қочиш, қасддан баданга оғир ва ўртача оғир шикаст етказиш каби жиноятлари учун судланганлик кўрсаткичларида пасайиш қайд этилди.
Изоҳ (0)