Самарқанд вилояти ҳокими вазифасини бажарувчи Эркинжон Турдимов Ҳиндистоннинг қурилиш фаолияти билан шуғулланувчи Ping Pong Global Limited компанияси вице-президенти Воҳид Алимирза бошчилигидаги ишбилармонларни қабул қилди. Бу ҳақда «Зарафшон» хабар бермоқда.
Мулоқот чоғида вилоят раҳбари айни пайтда мамлакатда улкан қурилиш ишлари олиб борилаётгани, бунда маҳаллий қурувчилар билан бирга хорижлик мутахассислар ҳам ҳамжиҳат фаолият юритаётганини таъкидлади. Хусусан, вилоятда амалга оширилаётган бунёдкорлик ишларида хорижлик мутахассисларнинг иштирокидан икки томон ҳам манфаатдор экани қайд этилди.
В.Алимирза компания 1991 йилдан буён фаолият юритиб келаётгани, дунёнинг 21 давлатида маъмурий ва маданий бинолар, меҳмонхоналар, савдо мажмуалари, виллалар қуриб фойдаланишга топширгани, бозор нархларидан арзон, аммо сифат жиҳатдан жаҳон талабларига жавоб берадиган иморатлар қуришда катта тажрибага эга эканини билдирди.
Сафар давомида ҳиндистонлик ишбилармонлар Самарқанд шаҳрида бунёд этилаётган қурилиш объектлари билан танишди.
Изоҳ (0)