«Ўзавтосаноат» АЖ раиси автомобиллар нархининг нима сабабдан 14 фоизга ошишини изоҳлади

30 июль куни Халқаро пресс клубнинг «Ўзавтосаноат» АЖ фаолияти, соҳада амалга оширилиш лозим бўлган ишлар ҳамда компаниянинг келгусидаги истиқболли режаларига бағишланган сессияси ўтказилди. Унда «Ўзавтосаноат» АЖ раҳбар ва ходимлари, ўринбосарлари, экспертлар, тизимдаги йирик ишлаб чиқариш корхоналари, дилерлик марказлари раҳбарлари ҳамда журналистлар иштирок этди.

Қуйида «Ўзавтосаноат» АЖ раиси Шавкат Умурзоқовнинг кўпчиликни қизиқтираётган саволларга жавобларини тақдим этамиз.

Автомобильлар нархи нима сабабдан оширилди?

«1 августдан нархлар ошиши ҳақидаги хабарлар ижтимоий тармоқларда эълон қилинганидан кейин турли муҳокамалар, норозиликлар билдирилаяпти. Мен бу норозиликларни ўзимга бўлган қаттиқ эътироз деб қабул қиламан. Керак бўлса, биз кечаси билан жамоамиз билан ўйладик ва нархлар оширилиши сабабини биз халққа етказишимиз керак, деган қарорга келдик», — дейди «Ўзавтосаноат» АЖ раиси Шавкат Умурзоқов.

 «Ўзавтосаноат» АЖ раиси машиналар нархи нима сабабдан айнан 14 фоизга қимматлашганига қуйидагича изоҳ берди:

Молиявий инқироз

Бутун дунёда кузатилаётган молиявий инқироз таъсирларидан ҳали чиқиб кетолганимиз йўқ. Чунки, ўзи бошидан бу тизим бошидан соғлом рақобатга чидайдиган тизим яратилмаган эди.

Икки хил валюта курси. Доллар бирга бир кўтарилди. Лекин автомобиллар нархи 50 фоиз кўтарилмади. 50 фоиз эҳтиёт қисмлари валютага келади.

Коррупциялаштирилган ҳолат.

Авто инжиниринг бизда умуман ривожланмаган

Бу ҳолатлар 22 йил давом этганидан кейин у сурункали касалликка ўхшаб қолган. Уни бирданига шок ҳолатида даволаб бўлмайди. Сабаби, умуман бу соҳани йўқотиб қўйишимиз мумкин. Бу соҳа бизга жуда ҳам керакли, халқ учун хизмат қилувчи ва даромад келтирувчи соҳа.

Ҳозирда «Ўзавтосаноат»да камқонлик кузатилмоқда. Яъни маблағ етишмаслиги боис, ишлаб чиқариш қуввати камайиб кетган. Бутловчи қисмларни етказиб бераётган компаниялар ҳам кредитда ўтиргани боис, улар етказиб бераётган қисмларнинг нархида ҳам 10—15 фоиз устама ҳақ мавжуд. Биз уларни ҳам даволашимиз керак. Мен сизларга ваъда бераман, кейинги йилдан эътиборан автомобиллар нархларида чегирмалар қиламиз, нархларни пасайтиришга ҳаракат қиламиз. Лекин ҳозирда сизлардан илтимос, Facebook’да ёзган барча эътирозингизни мен қабул қиламан, тўппа-тўғри деб биламан. Кейинги йили ҳаммаси ўзгаради. Сизлар буни сезасизлар!.

Шавкат Умурзоқов, «Ўзавтосаноат» АЖ бошқарув раиси