«Супер келинчак», «Зирапча», «Ташландиқ», «Ичкуёв» каби фильмлардаги роллари билан танилган актриса Диана Ягофарова «The Mag» журналига интервью берди. Интервьюда актриса кинодаги 10 йиллик танаффуси сабаблари ва шахсий ҳаёти ҳақида сўзлаб берди.
Диананинг айтишича, ўтган 10 йил давомида у ўзини оилага бағишлаган. У 9 йил аввал Мурод исмли йигитга турмушга чиққан эди. Ҳозирда улар икки ўғилни вояга етказмоқда.
«Ўтган 10 йил ичида мен ўзгардим. Мен ҳозирда янги ҳис-туйғуларни бошдан кечирмоқдаман. Она бўлганим бунда асосий рол ўйнади. Дунёга мен учун энг қадрли бўлган марваридларим кўзи билан қарай бошладим. Ўйлайманки, томошабинга айтар сўзим бор. Мақсадларим жуда катта: Кейинги йили Канн кинофестивалида қатнашиб, ўз юртимни дунёга танитмоқчиман. Ҳеч кимга сир эмаски, Ўзбекистон кейинги йили ушбу нуфузли фестивалда лауреат сифатида иштирок этади. Кино соҳаси ривожланаётгани мени жуда қувонтиради. Ҳукумат маблағ ажратяпти, фильмлар сифати ва мазмуни тубдан ўзгарди. Бундай имкониятлар киносаноатда фаолият юритувчи инсонлар ва актёрлар учун ривожланиш ва ижоднинг янги марраларини очади», — дейди Диана.
Нашр мухбири Диананинг турмуш ўртоғи Мурод Юнусхўжаевга юзланиб, ундан актрисанинг кинога қайтишига муносабатини сўраган. Саволга Диананинг турмуш ўртоғи қуйидагича жавоб беради:
«Дастлаб мен бунга иккиланиш билан қарадим. Ҳаётимнинг Диана билан ўтказган тўққиз йили давомида унинг ҳар доим ёнимда бўлиб, фарзандларимиз тарбияси ва уй ишлари билан шуғулланишига ўрганиб қолдим. Кино, суратга олиш жараёнлари, репитиция каби жараёнлар эса мунтазам равишдаги айрилиқни талаб қилади. Бироқ Диана ижодкор ва мақсадидан тойишмайдиган инсон. Шунинг учун унга истеъдодини юзага чиқаришга имкон бермаслик аҳмоқлик бўлади. Мен унинг кинога қайтишига қарши эмасман, аксинча уни ҳар томонлама қўллаб-қувватлайман».
Изоҳ (0)