Россияда савдо ҳажмининг тушиши муносабати билан «УАЗ» Ўзбекистонга 1000 та автомобиль етказиб беради

Россиянинг автомобиль ишлаб чиқарувчи «УАЗ» компанияси Ўзбекистонга жорий йилда 1000 та автомобиль етказиб беради, деб хабар қилади Spot.

Бу эса 2017 йилги кўрсаткичга нисбатан қарийб 2,5 баробарга кўп, дейилади хабарда.

Аввалроқ, «УАЗ» вакили Алексей Заболотний компания Ўзбекистон ҳудудида фақат автомобиль сотишни эмас, балки уларни йиғишни ҳам режалаштираётганини маълум қилган эди.

«Ўзбекистонда автомобиль бизнеси йўналишида яхши имкониятлар яратилган», — деган эди Заболотний.

Унинг сўзларига кўра, ҳозирда «Ўзавтосаноат» билан музокаралар олиб борилмоқда. Бироқ, музокаралар бўйича аниқ деталлар ошкор қилинмаяпти.

Қайд этилишича, музокаралар Patriot, Pickup ва Profi моделларини йиғиш бўйича олиб борилмоқда.