«Самарқанд» халқаро аэропорти орқали «Истанбул-Самарқанд» йўналиши билан учиб келган йўловчиларни кутиб олишга чиққан фуқаро Ҳ.Ҳ. қонунга хилоф равишда заргарлик тилла тақинчоқларини олиб кирмоқчи бўлганда божхона ходимлари томонидан унинг ноқонуний ҳаракатига чек қўйилди, деб хабар бермоқда «Дарё» мухбири Фарҳод Норбўтаев.
Самарқанд вилоят божхона бошқармаси берган маълумотларга кўра, фуқаро Ҳ.Ҳ. «Истанбул-Самарқанд» йўналишида учиб келган йўловчилардан ушбу заргарлик буюмларини йиғиб олган. Йиғиб олинган буюмлар холислар иштирокида кўздан кечирилганда, жами 23 дона дастлабки қиймати 39 681 900 сўмни ташкил этувчи оғирлиги 172,53 грамм аёллар тилла тақинчоқлари эканлиги аниқланган.
Суриштирув жараёнида фуқаро Ҳ.Ҳ.га ушбу заргарлик буюмларини Туркия давлатидан таниши жўнатиб юборганлиги, уларни гўёки олиб кириш нормаси доирасида олиб ўтган уч нафар йўловчилардан моддий манфатдорлик эвазига фойдаланганлиги аниқланди.
Божхона ходимларини алдамоқчи бўлган уддабурон шахсларнинг қилмишлари фош этилиб, тегишли процессуал ҳужжатлар расмийлаштирилди.
Бундан ташқари шу куни Самарқанд вилояти божхона бошқармаси ходимлари томонидан яна икки нафар шахслар томонидан заргарлик буюмларини қонунга хилоф равишда Ўзбекистон Республикаси худудига олиб кириш ҳолатлари ҳам аниқланди. Юқоридаги ҳолатлар юзасидан жами 270,52 грамм тилла заргарлик буюмлари олиб қўйилди.
Ҳозирда ушбу ҳолат юзасидан божхона текширувлари олиб борилмоқда.
Эслатиб ўтамиз, амалдаги тартибларга кўра жисмоний шахслар томонидан вазни 65 граммгача бўлган қимматбаҳо металл ва қимматбаҳо тошлардан ясалган заргарлик буюмларини божсиз олиб киришга рухсат этилган.
Жорий йилнинг ўтган даври мобайнида Самарқанд вилояти божхоначилари томонидан 1 кг.га яқин тилла буюмлари тўхтатиб қолинган.
Изоҳ (0)