Ўзбекистон Президентининг 2018 йил 27 июндаги «Ўзбекистон Республикасида оила институтини мустаҳкамлаш концепциясини тасдиқлаш тўғрисида»ги қарори мазмун-моҳиятини етказиш мақсадида 7 июль куни «Туркистон» санъат саройида Тошкент гарнизонида хизматни ўтаётган ҳарбий хизматчилар ва уларнинг оила аъзолари билан «Оила — жамият таянчи» мавзусида маънавий-маърифий тадбир ўтказилди. Бу ҳақда Мудофаа вазирлиги матбуот хизмати «Дарё»га хабар берди.
Мазкур тадбирда ҳарбий хизматчилар оилаларининг мустаҳкамлигини таъминлаш, оилаларда учрайдиган ижтимоий-маиший муаммолар ва уларнинг ечимлари тўғрисида маърузалар ўқилди.
Давра суҳбатида иштирок этган мудофаа вазирининг ҳарбий-ватанпарварлик, маънавий-ахлоқий тарбия ва ёшлар билан ишлаш бўйича ўринбосари полковник Азизбек Икрамов, Вазирлар Маҳкамаси ҳузуридаги «Оила» илмий-амалий тадқиқот маркази мутахассиси, психолог Феруза Акрамова, Хотин-қизлар қўмитаси раиси ўринбосари Мукаррам Нурматова, Тошкент шаҳар бош имом-хатиби Шайх Абдулазиз Мансур, Психология Ассоциацияси мутахассиси, психолог Шоира Исакова «Оилалардаги ижтимоий-маънавий муҳитга таъсир қилувчи омиллар» ҳамда «Исломда аёлнинг оиладаги ўрни, оилада эр-хотин муносабатлари» мавзуларида иштирокчиларга маъруза берилди.
Эслатиб ўтамиз, Ўзбекистонда хотин-қизларнинг ижтимоий-сиёсий ва социал фаоллигини ошириш, уларнинг турли соҳа ва тармоқларда ўз қобилият ва имкониятларини рўёбга чиқариши учун шарт-шароит яратиш, ҳуқуқ ва қонуний манфаатларига сўзсиз риоя қилинишини таъминлаш, оналик ва болаликни ҳар томонлама қўллаб-қувватлаш, шунингдек, оила институтини мустаҳкамлаш борасида кенг кўламли ишлар амалга оширилмоқда.
Шунингдек, Мудофаа вазирлиги томонидан тадбир мавзусига доир видеофильм ҳам намойиш этилди.
Изоҳ (0)