Кеча, 4 июль куни Ўзбекистон Республикаси Ер ресурслари, геодезия, картография ва давлат кадастри давлат қўмитаси қошидаги ДУК «Геоиннавация маркази» директори Талъат Абдуазизов раҳбарлигидаги бир гуруҳ ходимлар Хитой Халқ Республикасининг Шэньчжэнь шаҳридан қайтиб келди. Бу ҳақда «Дарё»га қўмита вакиллари хабар бермоқда.
ХХРга қилинган ташриф чоғида, яъни 2018 йил 29 июнь куни Ер ресурслари, геодезия, картография ва давлат кадастри давлат қўмитаси қошидаги ДУК «Геоиннавация маркази» ва BShark Holdings Ltd. компаниялари билан Ўзбекистонда замонавий пилотсиз технологияларни ривожлантириш соҳасида ҳамкорлик қилиш тўғрисидаги меморандум имзолади.
Хитой компаниялари пилотсиз учиш аппаратлари (ПУА) ишлаб чиқаришни келгусида замонавий стандартлар ва техник шартларга асосан локаллаштиришни режалаштирмоқда. Ҳамкорлик тўғрисидаги меморандумнинг мақсади — Ўзбекистонда замонавий пилотсиз технологияларни ривожлантиришга кўмаклашиш, шунингдек ПУАнинг янги лойиҳаларини тадқиқ қилиш, ишлаб чиқиш ва янги ПУА моделларини ишлаб чиқариш, ПУА, ер усти бошқарув станциялари, фойдаланишнинг ер усти таъминот воситалари ва бошқа техник воситалар эксплуатацияси ва уларга техник хизмат кўрсатиш каби йўналишларда амалий ёрдам беришдан иборат.
Imzoланган меморандумга мувофиқ томонлар биргаликда ўқитиш дастурларини ишлаб чиқади, семинарлар ўтказади, ўзаро манфаатли соҳаларда мутахассислар билан алмашинади, ҳамкорликни мувофиқлаштириш учун икки томонлама ишчи ташрифлар ташкил этади, ПУАнинг янги лойиҳалари бўйича тадқиқотлар, ишланмалар, ПУА ишлаб чиқариш ҳамда эксплуатацияси ва уларга техник хизмат кўрсатиш жараёнида олинган натижаларга оид ахборот ва тажриба алмашиб туради. Ундан ташқари, ишлаб чиқариш ускуналари ва технологияларини етказиб бериш, ходимларни ўқитиш, сотувлар ва маркетинг бўлимини ташкил қилиш ва мувофиқлаштириш каби ишларни амалга оширишни режалаштирган.
Изоҳ (0)