2018 йил 22 июнь куни фуқаро Н.Т. ариза билан мурожаат қилиб, жорий йил 3 июнда Каттақўрғон шаҳар ИИБ тезкор вакили С.Умаров ва бошқалар уни шаҳар ИИБ биносида ҳақорат қилиб, ечинишга мажбур қилишганлигини билдирган. Бу ҳақда Бош прокуратура матбуот хизмати маълум қилди.
Ҳолат юзасидан вилоят прокуратураси томонидан ўтказилган терговга қадар текширувда шу куни соат 10:00 атрофида фуқаро Н.Т. Каттақўрғон шаҳрининг «Деҳқон бозори»да бўлган вақтида шаҳар ИИБ ходимлари уни ўғрилик қилганликда гумон қилиб, шаҳар ИИБ маъмурий биносига олиб келишганлиги аниқланган.
Шаҳар ИИБ тезкор вакили С.Умаров ўғрилик қилиш мақсадида бозорга келганлигини айтиб, уни ҳақорат қилган. Сўнг ИИБ маъмурий биносининг коридорида Н.Т. нинг эгнидаги барча кийимларини ечишга мажбур қилиб, бу ҳолатни ўзи видеотасвирга олган.
2018 йил 4 июль куни Самарқанд вилоят прокуратураси томонидан Каттакўрғон шаҳар ИИБ тезкор вакили С.Умаровга нисбатан Жиноят кодексининг 206-моддаси 1-қисми билан жиноят иши қўзғатилди.
Ҳозирда С.Умаров ушланган ва унга нисбатан қамоққа олиш тарзидаги эҳтиёт чорасини қўллаш масаласи кўриб чиқилмоқда.
Шунингдек, Каттақўрғон шаҳар ИИБда мазкур ҳолат юзасидан хизмат текшируви ўтказилмоқда.
Изоҳ (0)