Бельгиялик Лоран Симмонс исмли бола саккиз ёшида мактабни битириб, университетга ўқишга киришга тайёрланмоқда, деб ёзади «РИА Новости».
Лоран ўрта мактабнинг олтита синфини бир ярим йилда ўқиб битирди ва 18 ёшли битирувчилар билан бирга аттестат олди. Боланинг ота-онаси таъкидлашича, унинг IQ кўрсаткичи 145 га тенг.
Лоран RTBF’га берган интервьюсида севимли фани математика эканлиги, «чунки у шунчалик кенг кўламли бўлиб, ҳам статистика, ҳам геометрия, ҳам алгебрани ўз ичга олиши»ни айтди.
Ўқувчининг ота-онаси айтишича, бўш вақтларида у математикадан масалалар ечишни ва тиббиёт бўйича китоблар ўқишни яхши кўради. Авваллари у жарроҳ ёки астронавт бўлишни истаган, аммо энди информатикага мойиллик кўрсатмоқда. Ота-онаси, шунингдек, Лоран доим ўзига хос бўлгани ва бошқа болалар билан ўйнашни яхши кўрмаганини қайд этди.
Ёзги таътилдан кейин ёш вундеркинд университетга ўқишга кирмоқчи. Ҳозирча у ўқув муассасасини танлагани йўқ, бироқ бутун дунё университетларидан таклифлар олмоқда.
Изоҳ (0)