Олий суд, АҚШ Халқаро тараққиёт агентлиги ва БМТ Тараққиёт дастурининг «Ўзбекистонда қонун устуворлиги йўлида ҳамкорлик» қўшма лойиҳаси доирасида яратилган E-Sud тизимига жорий йилнинг ўтган даврида 388 мингга яқин мурожаат келиб тушди. Бу ҳақда Олий суд расмий вакили Азиз Обидов маълум қилди, дея хабар беради ЎзА.
Бундан 227593 таси суд буйруғи бериш тўғрисидаги ариза, 160 мингдан ортиғи эса даъво тартибида ҳал қилинадиган аризалар.
Электрон шаклда келиб тушган даъво аризалари ва аризалар қуйидаги тоифалардан иборат: никоҳдан ажратиш — 25,6 фоиз, юридик аҳамиятга эга бўлган фактларни тасдиқлаш — 8,07 фоиз, ҳужжатнинг тегишлилигини белгилаш — 7,1 фоиз, қарзни ундириш — 5,8 фоиз ва оилавий муносабатлар билан боғлиқ бошқа низолар — 5,1 фоиз.
Судларга E-Sud тизими орқали келиб тушган аризалар ва даъво аризаларининг ўртача 20 фоизи аёл фойдаланувчилар томонидан берилган. Бу хотин-қизлар замонавий ахборот-коммуникация технологиялари имкониятларидан самарали фойдаланаётганини кўрсатади.
Шунингдек, судларга электрон тарзда мурожаат қилаётган адвокатлар сони ҳам ортиб бормоқда. Хусусан, бугунги кунда E-Sud тизимида 379 нафар адвокат рўйхатдан ўтган бўлиб, улар томонидан шу йил бошидан буён фуқаролик ишлари бўйича судларга жами 8 мингга яқин электрон ариза топширилган.
Изоҳ (0)