Самарқанд шаҳрида йил охиригача қурилиш ишлари тўхтатилади. Бу ҳақида Самарқанд шаҳар ҳокимлигида бўлиб ўтган йиғилишда шаҳар ҳокими Фурқат Раҳимов таъкидлаб ўтди, дея хабар бермоқда «Дарё» мухбири.
Самарқанд шаҳрининг янги лойиҳаси тасдиқлаб олиш масаласида бўлиб ўтган йиғилишда Самарқанд давлат архитектура-қурилиш институти ректори Султон Ахмедов, институт доцентлари Муҳсин Хидиров, Шавкат Ачилов, Ҳабибулло Қаюмов, Раҳимжон Авазов, профессор Адҳам Ўролов, шаҳар архитектори ва журналистлар иштирок этди.
Йиғилишда шаҳар ҳокими Фурқат Раҳимов сўнгги пайтларда Самарқанд шаҳрида қурилаётган бинолар қурилиш ишларида белгиланган талаблар ва архитектура меъёрларида четланишлар юз бераётгани бўйича оммавий ахборот воситалари ва ижтимоий тармоқларда танқидий фикрлар билдирилаётгани, қурилиш ишлари шаҳардаги маданий мерос объектларига жиддий зарар етказаётганлигини билдириб ўтди.
Учрашув давомида шаҳар ҳокими Фурқат Раҳимов айни дамда Самарқанд шаҳрининг яроқли бош режасининг ўзи йўқлигини билдириб, шаҳардаги мавжуд ЮНЕСКО маданий мероси объектлари сифатида тан олинган объектларни авайлаб асраш, мавжудларини инвесторларга бериш устида оқилона иш олиб борилиш лозимлигини билдирди.
Йиғилиш давомида мутахассислар Самарқанд шаҳрининг сўнгги бош режаси 1990—2005 йиллар учун мўлжалланганлиги, айни пайтда аниқ бир бош режанинг йўқлигини айтиб, ҳозирда олиб борилаётган қурилиш ишлари қайси режага асосан амалга оширилаётганлиги номаълум эканлигини қайд этиб ўтди.
Йиғилишда Самарқанд шаҳрининг камида 2035 йилгача бўлган даврини қамраб оладиган бош режаси концепциясини ишлаб чиқиш, шаҳарнинг янги бош режасини тузиш учун махсус ишчи гуруҳи ташкил этиб, уларнинг ўрганишлари асосида самарқандликларнинг фикри сифатида «ТошбошпланЛITI»га янги бош режани тақдим этиш лозимлиги билдирилди.
Келгусида шаҳарда олиб борилаётган ҳар бир қурилиш ва реконструкция ишлари янги бош режа асосида олиб борилиши лозимлиги белгилаб олинди.
Изоҳ (0)