2018—2019-ўқув йилидан бошлаб Тошкент давлат юридик университети бакалавриатига ҳужжат топшириш Адлия вазирлиги ҳузуридаги Давлат хизматлари агентлигининг 201 та туман ва шаҳардаги марказлари орқали амалга оширилади. Бу ҳақда юридик университет матбуот хизмати «Дарё»га хабар берди.
Давлат хизматлари марказлари хорижий давлат фуқаролари, фуқаролиги бўлмаган шахслар, 16 ёшга тўлмаганлар ва магистратура босқичига топширувчи абитуриентлардан ҳужжатлар қабул қилмайди.
Ҳужжатлар 15 июндан 15 июлгача қабул қилинади. Абитуриент доимий рўйхатда турган жойидан қатъий назар ўзи хоҳлаган туман ёки шаҳарлардан биридаги давлат хизматлари марказида ҳужжат топшириши мумкин.
Абитуриент томонидан қуйидаги ҳужжатларнинг асл нусхаси тақдим этилади:
- паспорт;
- ўрта (11-синф), ўрта-махсус ёки касб-ҳунар ўқув муассасасини тугатганлиги тўғрисидаги ҳужжат (иловаси билан);
- имтиёзни тасдиқловчи ҳужжат (агар мавжуд бўлса).
Абитуриент маълумотлари Давлат тест марказининг махсус «Абитур» базасига электрон тарзда киритилади. Maxсус фото-техника воситаси ёрдамида абитуриентнинг сурати олиб қолинади. Давлат хизматлари маркази ходими маълумотларни 2 нусхада бланкада чоп этади ва нусхалардан бирини абитуриентга бериб, иккинчисини махсус йиғма жилдга тикиб қўяди.
Давлат хизматлари марказлари, Давлат тест маркази ва Тошкент давлат юридик университети қабул комиссияси ходимлари билан биргаликда абитуриентларнинг сони доимий кузатилади.
Ҳужжат топширганлар 29—31 июль кунлари абитуриент рухсатномасини олиш учун Тошкент давлат юридик университетининг қабул комиссиясига шахсан мурожаат қилиши шарт. Қабул комиссияси Давлат хизматлари маркази орқали абитуриентларга берилган Давлат тест маркази бланкасини текширади. Шунингдек, абитуриентнинг паспортидаги биометрик маълумотларини махсус сканер орқали текшириб, бармоқ изларини олади ва махсус рухсатномани беради.
1—15 август кунлари бўлиб ўтадиган тест синовларига кириш жараёнида абитуриентларнинг паспортидаги биометрик маълумотлар яна бир бор текширилади ва бармоқ излари идентификация қилинади.
Бундан ташқари, ногиронлиги бўлган абитуриентларга қабул квотасидан ташқари ўринлар сонининг 2 фоизи (12 нафар) миқдорида давлат гранти асосида жой ажратилди. Шунингдек, ҳарбий хизматчиларнинг фарзандлари учун қуйидаги имтиёзлар жорий қилинган:
а) амалдаги ҳарбий хизматчининг фарзандларига қабул квотасидан ташқари квотанинг 5 фоизи (30 нафар) миқдорида давлат гранти асосида жой ажратилди;
б) хизмат давомида вафот этган, оғир касалликларга чалинган, ярадор бўлган ҳарбий хизматчиларнинг фарзандларига қабул квотасидан ташқари давлат гранти асосида имтиёз тақдим этилади — улар тест топширмайди.
Хорижий давлат фуқароларининг ҳужжатларини қабул қилиш 15 мартдан бошланган. Бугунги кунга қадар Россия, Украина, Қозоғистон ва Туркманистонлик абитуриентлар қабул комиссиясига мурожаат қилган. Улар суҳбат асосида университетга қабул қилинади.
Тошкент давлат юридик университети магистратурасига қабул қилиш бўйича қуйидаги янгиликлар жорий қилинди:
- квота 120 нафардан 150 нафарга кўпайтирилди;
- 3 та янги йўналиш (Ҳуқуқ ва бизнес, Молиявий-ҳуқуқий мониторинг, Ҳуқуқ ва ахборот технологиялари) очилди;
- ўқиш муддати 2 йилдан 1 йилга қисқартирилди;
- тестлар бекор қилинди ва 2 та фан (махсус фан ва чет тили) бўйича ёзма имтиҳон топшириш тизими жорий этилди.
Изоҳ (0)