Қозоғистонда дафн маросимларида «йиғлаб берувчилик» касби кенг тарқалмоқда

Қозоғистоннинг Қизилўрда вилоятида дафн маросимларида «йиғлаб бериш» ва марсиялар куйлаш «касб»лари пайдо бўлди, деб ёзади «Nur.kz». Энг ҳайратланарли томони шундаки, уларнинг хизматларига талаб катта.

«Йиғлаб берувчи» аёллар асосан қишлоқларда яшайди. Улар газеталарга реклама, эълон бермайди, шунга қарамай, уларни излаб келишади.

Бундай «касб»ларнинг пайдо бўлишига қадимий анъаналарнинг унутилиб бораётгани сабабчи бўлмоқда, дейилади хабарда. Маълум бўлишича, дафн маросимларида ижро этиладиган марсияларни ҳозирда оддий одамлар билмайди, шундай ҳолатларда марсия куйлаб берувчи аёлларни қидиришга тўғри келмоқда.

«Йиғлаб берувчи» аёлларга яхши пул тўлашади. Баъзилар совға беради, рўмол, камзул, тўн, ҳатто, қорамол ҳадя қилади.