Қорақалпоғистонда махсус тергов хоналари ташкил этилди. Уларда гувоҳ, жабрланувчи ва гумон қилинувчи бир-бирини кўрмайди

Қорақалпоғистон Республикаси Ички ишлар вазирлиги ҳузуридаги тергов бошқармасида тергов жараёнларини стенография қилиш, видеоназорат, шунингдек, тергов ҳаракатларини аудио ва видео шаклида ёзиб олиш тизимлари билан жиҳозланган мажмуа ташкил қилинди. Бу хақида вазирлик матбуот хизматига таяниб, ЎзА мухбири Есимхан Қаноатов хабар берди.

Мажмуа махсус тергов хонаси, ўсмирлар тергов хонаси ва оператор хонасидан иборат.

Мазкур махсус тергов хоналари қурилишида жабрланувчи ва гувоҳларни гумон қилинаётган шахс билан юзлаштиришга амал қилинадиган халқаро нормалар ҳисобга олинган. Бунда гумон қилинувчи шахс ўзига кўрсатма бераётган жабрланувчи билан юзма-юз кўришмайди, балки алоҳида хонада ўрнатилган монитор орқали уларни кўради. Гувоҳ ёки жабрланувчи гумон қилинаётган шахсни кўрмайди. 

Сабаби, жиноятга алоқадор шахсни кўрган жабрланувчи рухий зарба олиши мумкин. Бу эса тергов жараёнини оғирлаштирадиган ҳолатлардан ҳисобланади. Шу сабабли мажмуада назорат камералари ўрнатилган, операторлар тасвирни керакли хонада мониторга етказиш билан шуғулланади.