Фуқароларнинг ўзини ўзи бошқариш органлари фаолиятини мувофиқлаштириш бўйича Тошкент вилояти кенгаши томонидан муборак Рамазон ойида қатор хайрли тадбирлар амалга оширилмоқда. Бу ҳақда ЎзА хабар берди.
Маълумотларга кўра, вилоятда мавжуд 30 та муқаддас қадамжо ва 797 та қабристон тартибга келтирилиб, ободонлаштирилган. Ижтимоий ҳимояга муҳтож инсонлар ҳар томонлама қўллаб-қувватланиб, ёлғиз кексалар, боқувчисини йўқотганлар, бемор ва ногиронлар ҳолидан мунтазам хабар олинмоқда.
Шу кунга қадар шу тоифадаги аҳолининг 380 нафарига 95 миллион сўмлик моддий ёрдам кўрсатилган. 1200 дан ортиқ кишига 72 миллион сўмлик озиқ-овқат маҳсулотлари берилган. Шунингдек, маҳаллаларда Рамазон ойининг мазмун-моҳияти, оилаларда меҳр-оқибат, ўзаро ҳурмат муҳитини мустаҳкамлашга қаратилган тарғибот тадбирлари ташкил этилиб, ифторлик маросимларини камчиқим ва исрофгарчиликсиз ўтказиш бўйича тавсиялар берилмоқда.
Рамазон ҳайитини муносиб нишонлашга пухта ҳозирлик кўрилмоқда. Уч кун давом этадиган ҳайит байрами кунлари ижтимоий ҳимояга муҳтож 1000 дан зиёд фуқаронинг ҳолидан хабар олиш, уларга кийим-кечак ва озиқ-овқат маҳсулотлари улашиш режалаштирилган.
Изоҳ (0)