Учқудуқлик ёш авточилангар Акмал Ҳамроев енгил туртки билан айланувчи ва фойдали иш коэффициенти деярли нолга тенг спиннерни такомиллаштириб, сарфланадиган механик энергияни электр энергиясига айлантириш йўлини топди. Бу ҳақда «Халқ сўзи» хабар бермоқда.
Акмал Учқудуқ шаҳридаги кончилик касб-ҳунар коллежини тугаллаб, НКМК тизимидаги автотранспорт бошқармасида автослесар бўлиб ишламоқда. Ихтиролари билан ҳамкасблари ва тенгдошларини ҳайратга солибгина қолмай, корхона фаолияти билан боғлиқ жараёнларда новаторлик ишланмаларини ҳам таклиф этиб туради. Такомиллаштирилган спиннер масаласига келсак, ундан электр тармоғидан олис ҳудудларда мобил телефон аппаратларини зарядловчи мослама сифатида фойдаланиш мумкин. Муҳими, зарядлаш симсиз амалга оширилади.
Ихтирочи айни кунларда ўзи яратган яна бир янгилик устида изланишлари давом эттирмоқда. Мазкур мослама аслида аксарият ошхоналарга ўрнатилган оддий ҳаво сўрғичнинг ўзгинаси. Фарқи шундаки, у хонадонда газ чиқиши билан ишга тушиб, хонадон соҳибларини «Диққат, газ!» сигнали билан огоҳлантиради.
«Мослама газ аварияси юз берганда, хонадон соҳибининг мобил телефонига ҳам огоҳлантирувчи хабар бериши лозим. Ҳозир шу масалада иш олиб бормоқдаман. Агар уни ярацам, шунда авария зудлик билан бартараф этилиб, газ билан боғлиқ бахтсиз ҳодисаларнинг олди олинади», — дейди Акмал Ҳамроев.
Акмал яратган яна бир янгилик робот-чангютгичдир. У ультратовушлар ёрдамида ҳаракатланиб, ўз йўналишини аниқлайди. Албатта, бундай дастёрлар бугунги кунда муомалада бор-ку, деган савол туғилиши табиий. Гап шундаки, Акмал уларнинг барчасини ўз қўлидаги арзон воситалар ва муҳими, ўз интеллекти ёрдамида ясаган.
Изоҳ (0)