Термиз шаҳрида Сурхондарё вилоятининг инвестиция, экспорт ва туризм салоҳиятини намойиш этишга бағишланган «Очиқ Жануб» деб номланган халқаро бизнес-форум бўлиб ўтмоқда. Бу ҳақда ЎзА хабар берди.
Дунёнинг йигирмага яқин давлатидан 160дан ортиқ ишбилармон доира вакиллари, хорижий давлатларнинг Ўзбекистондаги элчилари, чет эл ваколатхоналари ходимлари иштирок этаётган анжуманнинг тантанали очилиш маросимида қадимдан Буюк ипак йўли чорраҳасида жойлашган Сурхон воҳасининг жаҳон цивилизацияси тарихида муҳим ўринга эга экани таъкидланди.
130 минг йиллик тарихга эга, неандертал одам боласининг бош суяги топилган Бойсун тоғидаги «Тешиктош» ғори инсониятнинг илк манзилгоҳи сифатида эътироф этилган. Шеробод туманининг Зараутсой қояларидаги инсон ва табиат билан боғлиқ минглаб тасвирлар (петроглифлар) бу замин қадимдан маданият ва санъат ўчоғи эканлигидан далолат беради. Далварзинтепа ёдгорлигида Кушон императори Вима Кадфузнинг муҳри топилгани ҳам мамлакат давлатчилик тарихида ўзига хос ўрин тутиш билан бирга бу ер қадимдан йирик савдо-сотиқ маркази бўлганига яққол мисол. Сополлитепа, Фаёзтепа, Далварзинтепа, Қоратепадаги тарихий ёдгорликлар бой ўтмишдан гувоҳлик беради.
Термиз шаҳридаги Марказий Осиёда ягона бўлган Археология музейидан ўрин олган юз мингдан ортиқ ноёб экспонат дунё аҳлида бу юртнинг ўтмиши ва бугунги тараққиёт босқичига катта қизиқиш уйғотмоқда.
Ҳаким Термизий, Исо Термизий каби буюк алломаларга бешик бўлган вилоятда 400 дан ортиқ тарихий обида, моддий ва маданий мерос объектлари мавжуд. Бу вилоятнинг зиёрат туризмини ривожлантиришда муҳим омил саналади. Сангардак шаршараси, «Ўринбулоқ», «Пошҳурт», «Сайроб» «Хўжасоат», «Омонхона» каби шифобахш булоқлари ва сиҳатгоҳлари табиат ҳамда тиббиёт туризмини юксалтиришга хизмат қилмоқда.
Бизнес-форумда қатор вазирлик ва қўмиталар Ўзбекистоннинг сайёҳлик, инвестициявий, экспорт салоҳияти юзасидан тақдимотларини ўтказди. Шунингдек, Сурхондарё вилоятининг инвестиция ва сайёҳлик салоҳияти тақдим этилди.
Изоҳ (0)