Vogue журналининг Саудия Арабистони учун чиқарадиган версияси июнь сонида қироллик маликаси Хайфа бинт Абдулла ас-Сауднинг машина рулидаги сурати чоп этилди. Бу ҳақда TJournal хабар бермоқда.
Сурат орқали нашр маҳаллий аёлларнинг машина ҳайдашига тақиқнинг олиб ташланишини қўллаб-қувватлаган.
Суратда Хайфа бинт Абдулла ас-Сауд қизил кабриолетда ҳайдовчи ўриндиғида ўтиргани акс этган. Муқовада «Ҳаракатлантирувчи куч» деб ёзилган. Малика Vogue журналига берган интервьюсида Саудия Арабистонида ҳануз консерваторларнинг кўплиги, бироқ у ўзгариш ва янгиликларни қўллаб-қувватлашини айтган. Журнал таҳририяти саудиялик аёл билан биргаликда тақиқнинг бекор қилинишини нишонлашини айтган.
Кўпчилик Vogue’нинг июнь сони муқовасини танқид қилган. Журналда аёлларнинг машина ҳайдашига бўлган тақиқни бекор қилиш учун курашган ва ҳибсга олинган сиёсий фаоллар тилга олинмагани учун Vogue ижтимоий тармоқ фойдаланувчиларининг танқидига учраган. Ҳаттоки айримлар муқовадаги маликанинг юзини ҳибсга олинган сиёсий фаолларнинг юзига алмаштирган.
Эслатиб ўтамиз, 2017 йилнинг сентябрида Саудия Арабистони қироли аёлларга машина ҳайдашга рухсат бериш тўғрисидаги фармонга имзо чеккан.
Изоҳ (0)