Россия Украинанинг босиб олинган Херсон, Харьков ва Запорожье вилоятлари ҳудудларида 10 нафар тинч аҳолига нисбатан жинсий қийноқлар қўллаган. Бу ҳақда БМТнинг қийноқлар ва шафқатсиз муомала бўйича махсус маърузачиси Элис Жилл Эдвардс хабар берди.
Қийноққа солинганлик бўйича тегишли маълумотлар Россияга етказилган.
Тўрт аёл ва олти эркакнинг тажрибасини акс эттирувчи бу алоҳида баёнотлар ҳақиқатан ҳам даҳшатли. Бироқ улар кенгроқ ҳужжатлаштирилган манзаранинг фақат кичик бир қисмини ташкил этади, деди Эдвардс.
Ҳужжатлаштирилган барча ҳолатларда электрошок қўллангани, жумладан, жинсий аъзоларга нисбатан ҳам ишлатилгани таъкидланган.
Тинч аҳоли калтакланган, тепиб урилган, кўзлари боғланган, баъзи ҳолларда эса чўктириш ва қатл этиш саҳналари имитация қилинган, дейилади хабарда.
БМТ махсус маърузачиси тинч аҳолини ҳимоя қилишга ва Россияни жавобгарликка тортишга чақирди.
Ҳарбий можароларда халқаро ҳуқуқнинг асосий қоидаларидан бири — тинч аҳоли ҳимояланган бўлиши керак, дея эслатди Эдвардс.
У, шунингдек, ўзбошимчалик билан ҳибсга олиш ва ушлаб туриш, ҳамда фуқароларнинг соғлиғига бўлган ҳуқуқларининг жиддий бузилиши ҳақида “ишончли далиллар” мавжудлигини таъкидлади. Олинган маълумотларга кўра, қамоқ жойларидаги қийноқлар оқибатида, жумладан, тиббий ёрдам кўрсатишни рад этиш туфайли ўлим ҳолатлари ҳам қайд этилган.
Изоҳ (0)