Парламент қуйи палатасидаги Экоҳаракат депутатлар гуруҳининг йиғилишида Вазирлар Маҳкамаси томонидан тақдим этилган Ўзбекистон Республикаси давлат бюджети ва давлат мақсадли жамғармалари бюджетларининг 2017 йил ҳамда 2018 йилнинг I чораги якунлари бўйича ҳисоботи муҳокама қилинди. Бу ҳақда ЎзА хабар бермоқда.
Қайд этилганидек, 2017 йилда давлат бюджети даромадлари 49 триллион 681 миллиард сўмни ташкил қилиб, 2016 йилга нисбатан 21 фоизга ўсган. Шу билан бирга, даромадларнинг бир маромда тушиши ҳамда бюджет маблағларидан самарали фойдаланишни таъминлаш орқали давлат бюджети ялпи ички маҳсулотга нисбатан 0,1 фоиз миқдорида профицит билан ижро этилиши таъминланган.
Давлат бюджетининг 2017 йилдаги ижросида атроф-муҳитни муҳофаза қилишга сарфланган жами харажатлар миқдори 966,6 миллиард сўмни ташкил этди. Хусусан, ҳисобот даврида Оролбўйи минтақасида амалга оширилаётган экологик тадбирлар учун 50 миллиард сўмдан ортиқ маблағ йўналтирилган.
2017 йилда Ўзбекистон Республикаси Молия вазирлиги ҳузуридаги Оролбўйи минтақасини ривожлантириш жамғармасининг даромадлари 189,9 миллиард, жами харажатлари 123,5 миллиард сўмни ташкил қилган. Дастур доирасида амалга оширилган харажатлар Оролбўйи минтақасида экологик ва ижтимоий-иқтисодий вазиятни ва аҳолининг турмуш шароитини яхшилаш ва сифатини оширишга йўналтирилганлиги билан устувор аҳамият касб этади.
Шу билан бирга, 2018 йилнинг I чорагида давлат бюджети ҳисобидан табиатни муҳофаза қилиш тадбирлари учун 112 миллиард сўм сарфланган бўлиб, ўтган йилга нисбатан 15,6 миллиард сўмга камайган.
Ўзбекистон Республикаси Президентининг «2017—2021 йилларда маиший чиқиндилар билан боғлиқ ишларни амалга ошириш тизимини тубдан такомиллаштириш ва ривожлантириш чора-тадбирлари тўғрисида»ги қарори билан ҳудудларда санитар-тозалаш хизматини кўрсатиш сифатини янада яхшилаш мақсадида тасдиқланган дастур доирасида чиқинди полигонларни тартибга келтириш, ассенизатор махсус техникаси, чиқиндини эловчи электромеханик ускуналар харид қилиш, чиқинди йиғиш шохобчалари қуриш ва уларни контейнерлар билан жиҳозлаш назарда тутилган. Ҳисобот даврида ушбу мақсадларни амалга ошириш учун 91,9 миллиард сўм маблағ ажратилган.
Йиғилишда депутатлар томонидан атроф-муҳитни муҳофаза қилиш, аҳоли саломатлигини яхшилаш ва экологик муаммоларни ҳал этиш учун давлат бюджетидан ажратилаётган маблағлардан мақсадли, самарали фойдаланиш ҳамда бюджет интизомига риоя қилиниши юзасидан назоратни кучайтириш, табиий ресурслардан фойдаланишга қаратилган дастурларнинг давлат бюджетидан молиялаштириладиган чора-тадбирлар ижросини тўла таъминлаш юзасидан фикрлар билдирилди.
Изоҳ (0)