Жиноят ишлари бўйича Марғилон шаҳар суди томонидан «Сувоқава» давлат унитар корхонаси Марғилон шаҳар бўлими биносида навбатдаги сайёр суд мажлиси ўтказилди. Бу ҳақда «Дарё» мухбири хабар берди.
Сайёр суд мажлисида Ўзбекистон Республикаси Жиноят кодексининг 168-моддаси 3-қисми «в» банди, 211-моддаси 1-қисми билан айбланган мазкур корхонанинг собиқ ҳисобчиси Ф. П. га оид жиноят иши кўриб чиқилди.
Суд мажлисида Ф. П. корхона ҳисобчиси лавозимида ишлаган вақтида хизмат мавқеидан фойдаланиб, фуқаро К. Ҳакимовнинг сув истеъмолидан бўлган 1550000 сўм қарзини йўқ қилиб бериш эвазига 900000 сўм пора олаётганида ушлангани маълум қилинди.
Сайёр судда судланувчи ва гувоҳларнинг кўрсатувлари тингланди. Судланувчи ишлаб келган корхона раҳбарияти ва ходимларининг фикри эшитилди.
Суд якунида Ф. П. га муайян ҳуқуқдан маҳрум қилиш, ахлоқ тузатиш ва жарима жазолари тайинланиб, уларнинг ҳар бирини алоҳида ўташ лозимлиги белгиланди.
Изоҳ (0)