Гулистон шаҳрида умумтаълим мактаблари ва ўрта махсус, касб-ҳунар таълими муассасалари ўқувчилари ўртасида ўтказилган «Ёш ўт ўчирувчи» мусобақасининг республика босқичи ниҳоясига етди. Бу ҳақда ЎзА хабар берди.
Гулистон марказий ўйингоҳи, Гулистон олимпия захиралари коллежи ҳамда вилоят ИИБ ёнғин хавфсизлиги бошқармасида ўтган мусобақаларда иштирокчилар «Ишғол қилиш нарвонида ўқув минорасига кўтарилиш», «Ёнғин ўчирувчилар эстафетаси», «100 метрга тўсиқлар оша югуриш» ҳамда тест синовлари орқали маҳоратини намойиш этди.
Якуний натижаларга кўра, ўрта махсус, касб-ҳунар таълими муассасалари ўғил болалар жамоалари орасида Сирдарё вилояти жамоаси ғолиб бўлди. Иккинчи ва учинчи ўринларни мос равишда Жиззах ҳамда Андижон вилоятлари жамоаси эгаллади.
Умумтаълим мактаб ўқувчилари ўғил болалар жамоалари ўртасида Жиззах вилояти «Ёш ўт ўчирувчи»лари ғолиб бўлди. Иккинчи ўрин Қорақалпоғистон Республикаси, учинчи ўрин Наманган вилояти «Ёш ўт ўчирувчи»ларига насиб этди.
Ўқувчи-қизлардан ташкил топган «Ёш ўт ўчирувчи»лар жамоалари беллашувида Жиззах, Сирдарё, Хоразм, Тошкент, Навоий вилояти спортчи-қизлари турли номинациялар бўйича ғолиб бўлди.
Мусобақа ғолиблари орасидан «Ёш ўт ўчирувчи» Ўзбекистон терма жамоасининг таркиби шакллантирилади. Терма жамоа жорий йилда Болгарияда ўтказиладиган «Ёш ўт ўчирувчи»лар ўртасидаги жаҳон чемпионатида мамлакатимиз шарафини ҳимоя қилади.
Ғолиб ва совриндорлар диплом, медаль ва эсдалик совғалари билан тақдирланди.
Изоҳ (0)