Canon компанияси EOS-1V плёнкали фотокамера сотувини тўхтатди. Бу ҳақда Canon компанияси сайтининг японча версиясига таяниб, «Meduza» хабар қилди.
Компания сотилган фотокамераларни 2025 йилнинг 31-октябрига қадар таъмирлашни давом этади. Бироқ Canon вакиллари фотокамера деталлари етишмаган ҳолатда таъмирлаш тўғрисидаги аризалар 2020 йилнинг октябридан бошлаб рад қилиниши мумкинлигини маълум қилган.
EOS-1V Canon сотган энг охирги плёнкали аппарат бўлиб, профессионал фотокамера ҳисобланади. EOS-1V 2000—2010 йилларда ишлаб чиқарилган. 2010 йилдан кейин Canon фотокамеранинг омборларда қолганини сотиш билан шуғулланган.
Canon компанияси Японияда 1937 йили очилган ҳамда шу даврдан бошлаб плёнкали фотокамераларни ишлаб чиқаришни бошлаган. Биринчи рақамли камера (RC-701) ишлаб чиқаришни Canon 1986 йили йўлга қўйган.
Плёнкали аппаратларни Nikon компанияси ҳамон ишлаб чиқаришда давом этмоқда. Шунингдек, Leica, Fujifilm и Polaroid компаниялари олинган суратни шу заҳоти чиқариб берадиган плёнкали камераларни ишлаб чиқармоқда.
Изоҳ (0)