Бугун, 23 май санасида Бутунжаҳон этноспорт конфедерацияси раҳбари, Камончилар фонди васийлик кенгаши раиси, Туркия ёшлар фонди Олий маслаҳат кенгаши аъзоси Билол Эрдўғон ва «Туркия—Ўзбекистон» парламентлараро дўстлик гуруҳи раиси, Туркия буюк миллати мажлиси аъзоси Ҳайдар Али Йилдиз бошчилигидаги катта делегация Ўзбекистонга келди. Бу ҳақда Миллий олимпия қўмитаси матбуот хизмати «Дарё»га хабар берди.
Меҳмонларни Ислом Каримов номидаги Тошкент халқаро аэропортида Ўзбекистон Миллий олимпия қўмитаси президенти Умид Аҳмаджонов, Ўзбекистон Жисмоний тарбия ва спорт вазири Шоакрам Исроилов, Туркиянинг Ўзбекистондаги фавқулодда ва мухтор элчиси Аҳмад Башар Шен кутиб олди.
Туркия делегациясининг Ўзбекистонга ташрифидан мақсад ўзаро ҳамкорлик алоқаларини янада мустаҳкамлаш, уларни янги босқичга олиб чиқиш, шунингдек, камондан ўқ отиш бўйича ўтказиладиган «Фотиҳ Кубоги» халқаро турнирига бағишланган конференцияда иштирок этишдан иборат, дейилади МОҚ хабарида.
Маълумот учун Билол Эрдўғон Туркия президенти Ражаб Тоййиб Эрдўғоннинг 3-фарзанди ҳисобланади.
Изоҳ (0)