Совуқ хабарлар билан Тошкентга келган Шойгу, сел ва тошқинлар ичида қолган Ўзбекистон, яна бир лавозимидан озод этилган Парпиев ва куннинг бошқа муҳим хабарлари

22 майнинг эътиборга молик янгиликлари — «Дарё»нинг кечки дайжестида.

1. Шавкат Мирзиёев Россия мудофаа вазирини қабул қилди. Сергей Шойгу Президентдан аввал Ўзбекистон мудофаа вазири Абдусалом Азизов билан учрашди. Учрашувда Афғонистондаги вазият туфайли террорчиларнинг Марказий Осиёга ўтиб кетиш хавфи борлигини айтди.

2. Сув ва сел тошқинлари ичида қолган Ўзбекистон: Қурбонлар бор, етказилган зарар миқдори номаълум. Бунақаси кўпдан бери кузатилмаган эди. Табиий офатлар оқибатида камида саккиз киши ҳалок бўлган.

3. Бош прокурор Отабек Муродов раҳбарлигидаги ишчи гуруҳ Сурхондарёда селдан жабрланган оилаларга ёрдам кўрсатди. Самарқандда Нурободнинг Жом қишлоғига ёпирилган сел оқибатлари ҳам бартараф этилмоқда.

4. Диана Еникеевани уриб юборган ҳайдовчига чиқарилган ҳукм ўзгаришсиз қолди. Жиноят ишлари бўйича Каттақўрғон туман судининг 1 майдаги ҳукми билан Акром Элмуродов 6 йил муддатга озодликдан маҳрум этилган эди.

5. Amnesty International делегацияси 2004 йилдан буён биринчи марта Ўзбекистонга келади. Ташкилот сиёсий мақсадларда таъқиб қилинаётларнинг жиноят ишларини тўхтатиш ва оқлаш, шунингдек, ўтмишда амалга оширилган инсон ҳуқуқларига қарши жиноятларни холисона ва самарали тарзда текшириш кабилар ҳақида тавсиялар рўйхатини тайёрлаган.

6. «Ўзбектелеком» бош директори: Биз ниҳоят Skype, Viber, WhatsApp билан боғлиқ муаммоларни бартараф этдик. Директор Фарҳод Рўзиевнинг маълум қилишича, бу «энг оғриқли муаммолардан» эди.

7. Ботир Парпиев таэквондо WTF ассоциацияси президентилигидан ҳам кетди. Унинг ўрнига янги раҳбар тайинланди. Маълумот учун, Парпиев 2004 йилдан 2018 йил майига қадар Ўзбекистон Давлат солиқ қўмитасига раҳбарлик қилган.

8. «Чорвоқ» туристик зонасига McDonald’s, Starbucks ва Burger King’ни таклиф этишга қарор қилинди. Бу брендларнинг Ўзбекистон фаолият бошлаши учун уларнинг ўзи қандай талаблар қўяди?