2018 йил январь ойида Ўзбекистон футбол ассоциацияси (у вақтда ЎФФ) ва «Реал Мадрид» клуби академияси директори вакиллари учрашуви давомида «Қироллик клуби»нинг Real Madrid Foundation Clinic дастури асосида Ўзбекистонда «Реал Мадрид» клубининг футбол мактаби очилиши бўйича келишувга эришилганди.
Келишувга асосан бугун, 22 май куни Ўзбекистонга «Қироллик клуби» академиясининг менежерлари Андрес Антонио ҳамда Хуан Паблолар ташриф буюрди. Бу ҳақда ЎФА матбуот хизмати хабар берди.
«Реал Мадрид» академияси менежерлари билан ЎФА биринчи вице-президенти Умид Аҳмаджонов ўртасида учрашув бўлиб ўтди
Учрашувда «Қироллик клуби»нинг Real Madrid Foundation Clinic дастури асосида «Реал Мадрид»да фаолият юритаётган мураббийларни Ўзбекистонга олиб келиш, улар иштирокида республикадаги футбол мактабларида машғулотлар ўтказиш, футболчилар билан ишлаш жараёнлари ҳақида ўз тажрибалари билан ўртоқлашиш масалалари муҳокама қилинди.
ЎФА биринчи вице-президенти «Реал Мадрид» академиясидан ташриф буюрадиган мутахассислар учун ЎФА томонидан барча шарт-шароитлар муҳайё қилиниши, асосий мақсад «Қироллик клуби» академияси иш тажрибасини ўрганиш, у ерда фаолият олиб бораётган мутахассислардан Ўзбекистонда футболни ривожлантириш борасида тегишли маслаҳатлар олиш экани таъкидланди, дейилади хабарда.
Учрашув охирида Андрес Антонио ва Хуан Паблога ЎФАнинг эсдалик совғалари топширилди.
Эртага, 23 май санасида испаниялик мутахассислар «Бунёдкор» стадионига ташриф буюриб, у ердаги шарт-шароитлар билан танишади. Шунингдек, соат 11:00 да улар иштирокида ОАВ вакиллари учун матбуот анжумани ташкил қилиниши режалаштирилган.
Изоҳ (0)