«Ўзбектелеком»нинг янги раҳбарияти UzPhone миллий мессенжерини яратиш жараёнини музлатиб қўйди. Бу ҳақда февраль ойи охирида компания бош директори этиб тайинланган Фарҳод Рўзиев маълум қилди, деб хабар беради Spot.
2017 йил охирида «Ўзбектелеком»нинг «Ахборот тизимлари» филиали UzPhone миллий мессенжерини яратишни режалаштираётгани ҳақида хабарлар тарқалганди. Ўша вақтда мазкур янги сервис ўзининг дунёга машҳур муқобилларидан фарқли равишда кам трафик сарфлаши маълум қилинганди.
Сервис Smart-TV ва IP-телефония билан интеграциялашади. Компания серверлари 1 миллион кишига хизмат кўрсатиш имкониятига эга.
Рўзиевнинг айтишича, «Ўзбектелеком» биринчи навбатда телекоммуникация компанияси ҳисобланади, шундай экан у инфратузилма, интернет ва алоқанинг ривожланиши борасидаги муаммоларни ҳал этиши керак. Шу сабабли мессенжер устида олиб борилган ишлар тўхтатилган.
«Мен телекоммуникация операторлари томонидан яратилган дунёдаги бирорта муваффақиятли мессенжерни билмайман. Бу бошқа нарса. Биз шу турдаги муқобил сервислар билан қандай қилиб муваффақиятли рақобатлаша олишимизни билмаймиз», — дейди Фарҳод Рўзиев.
Бундан ташқари «Ахборот тизимлари» филиалининг саҳифаси ҳозирда «Ўзбектелеком»нинг асосий сайтига йўналтирилмоқда. Шунингдек, унинг тузилмаси ҳам ўзгарган — эндиликда у филиал эмас, балки марказ ҳисобланади.
Изоҳ (0)