«Лимузин, қиммат кўйлаклар ва ресторанлар»: Олмаота ҳокимлиги битирув кечалари ҳақида маълумот берди

Қозоғистонда битирув кечалари учун пул йиғиш ҳолатлари юзасидан кўпчилик ота-оналар норозилиги туфайли кўплаб таълим муассасалари бундай кечаларни ўтказишдан бош тортди, деб хабар беради «Nur.kz».

Олмаота ҳокимлигининг маълум қилишича, жорий йилда саҳарда лимузинларда сайр қилиш ва ресторанларда кечалар ўтказиш тақиқланади.

«Мактаблар ҳеч қачон болаларни лимузинларга пул йиғишга, қиммат кийимлар сотиб олишга, ресторанларда кечалар уюштиришга мажбурламаган. Жорий йилда бундай хатти-ҳаракатлар тақиқланади. Айрим мактаблар ота-оналар ташаббуси билан битирув кечалари ўтказишни режалаштирмоқда. Бироқ бу ўқувчиларга мактабни битиргани тўғрисидаги шаҳодатномалар топширилганидан сўнг ўтказилади», — дейилади хабарда.

Қайд этилишича, Қозоғистон фан ва таълим вазирлиги мактаб битирувчиларига шаҳодатнома топшириш санасини 15 июнь этиб белгилади.

Шу куннинг ўзидаёқ мактабни аъло баҳоларга битирган ўқувчиларга «Алтин белги» белгиси топширилади.