Қорақалпоғистон Республикаси Беруний тумани Навоий овул фуқаролар йиғинида яшовчи фуқаро Эргаш Ҳасанов туман истеъмолчилар ҳуқуқларини ҳимоя қилиш жамиятига мурожаат қилди, деб ёзади ЎзА.
Истеъмолчининг хонадонида 2015 йил 16 август куни электр ҳисоблагичсиз фойдаланиб ўтирганлиги тўғрисида далолатнома расмийлаштирилган.
2015 йил 17 август куни юқорида тузилган далолатномага асосан, қайта ҳисоб-китоб қилиниб, 1095 кунлик яъни, 3 йиллик муддатга электр энергия истемол қилинганлиги тўғрисида ҳисоблагичсиз электрдан фойдалангани учун Беруний ТЭTК электр энергиясидан 3 600 000 сўм жарима тўлови ҳисоблаб қарздорлик белгиланган.
Жамият ходимлари томонидан ўрганиш ишлари олиб борилиши натижасида истеъмолчининг 0,9 КВТ * 24 соат * 1095 кун = 23 652 КВТ соатни * 155 сўм таърифга кўпайтириш натижасида 3 666 060 сўм жарима ҳисобланганлиги маълум бўлди.
Нотўғри ҳисобланган қайта ҳисоб-китобни кўриб, аниқлик киритиш мақсадида Ўзбекистон Республикаси «Ўзбекэнерго» АЖга мурожаат қилинди. Истеъмолчининг аризаси адолатли ечим топиб, 2 800 000 сўм истеъмолчи фойдасига ҳал қилинди.
Изоҳ (0)