Чирчиқ дарёсининг қуйи қисмидаги Қўрғонча қишлоғини Чиноз тумани маркази билан боғлайдиган кўприк ёпиб қўйилди. Бунга иншоотнинг техник носозлиги — аста-секин чўкиб бораётганлиги сабаб бўлди, дея хабар беради «Халқ сўзи».
Бу тадбир нохуш ҳолатларнинг олдини олиш мақсадида амалга оширилди. Бироқ кўпчиликни ташвишлантираётгани мазкур кўприкни созлаш, таъмирлаш ёки қайта қуриш учун ўтган бир ҳафта давомида ҳаракат сезилмади.
Кўприкдан ҳозирча пиёдалар ўтиб турибди, автомобиль ҳаракати эса тўсиб қўйилган. Энди Қуйи Чирчиқ туманидаги Қўрғонча қишлоғидан Чиноз тумани марказига бориш учун автомобилда аввалгидек 3 эмас, 80 километр йўл босиб, Янгийўл тумани маркази Гулбаҳор орқали бориш лозим.
Йўловчиларни кўприк бошидан Чинозгача ёки у ердан Қўрғончагача элтиб қўйиш учун автотранспорт ҳанузгача белгиланмади. Бир ҳафтадирки, киракашларнинг ошиғи олча бўлиб қолди. Йўл ҳақини улар хоҳлаганича белгиламоқда.
Изоҳ (0)