Тайсон эмас, Цзю Ўзбекистонга келади. Бокс федерацияси Майк Тайсон борасидаги хабарларга изоҳ берди

«Оламспорт» нашри Жаҳон бокси афсонаси Майк Тайсон Мустақиллик байрами арафасида Ўзбекистонга келиши мумкинлиги ҳақида хабар берган эди.

Хабарга кўра, Профессионал бокс федерацияси америкалик собиқ жаҳон чемпионини Ўзбекистонга таклиф қилганди. Тайсон Ўзбекистонда мухлислари билан учрашиши, мастер-класс ўтиши ва матбуот анжуманида иштирок этиши лозим эди. «Xabar.uz»нинг ёзишича, Ўзбекистон бокс федерацияси Тайсоннинг келиши ҳақидаги хабарлар ҳақиқатдан йироқ эканлигини маълум қилган.

«Ҳақиқатан ҳам мустақиллик байрами арафасида катта бокс кечаси ташкил қилиб, унга жаҳон бокси афсоналарини таклиф қилишни режалаштирганмиз. Аммо Майк Тайсоннинг Ўзбекистонга келиши ҳақидаги хабарлар ҳақиқатдан узоқ. Чунки федерация у билан алоқага чиқмаган», — деган федерация матбуот хизмати вакили.

Унинг қўшимча қилишича, бокс кечасига бошқа бир таниқли спортчи Константин Цзю келиши кутилмоқда.