Испан футболи гегемонияси. ​Ла Лига жамоалари Европадаги охирги 13 та кубокнинг 12 тасини ўзиники қилди

Кеча, 16 май санасида Мадриднинг «Атлетико»си Европа Лигаси финалида Франциянинг «Марсель» жамоасини 3:0 ҳисобида мағлубиятга учратди ва ўз тарихида учинчи марта ушбу турнирда ғалаба қозонди.

Шу тариқа испан клублари 2013/14 йилги мавсумдан буён Европада 13 та кубокдан 12 тасини қўлга киритди, деб ёзади «Sports.ru».

Бу орада 2016/17 йилги мавсумдагина «Манчестер Юнайтед» Европа Лигасида ғолиб чиқиб, испан клублари гегемониясига тўсиқ қўя олганди.

Бу вақт ичида «Реал» (Чемпионлар Лигасида 3 марта, УЕФА Суперкубогида 3 марта), «Барселона» (1 марта Чемпионлар Лигаси ва 1 марта Европа Суперкубоги), «Севилья» (3 марта Европа Лигаси) ва «Атлетико М» (Европа Лигаси) жамоалари жами 12 кубокни Испанияга олиб келган.

Маълумот учун Европа Чемпионлар Лигаси 2017/18 йилги мавсуми финалида Мадриднинг «Реал» жамоаси «Ливерпуль»га қарши кураш олиб боради. Учрашув 26 май санасида бўлиб ўтади.