Аввал маълум қилганимиздек, Тошкент шаҳрида Германия—Ўзбекистон ишбилармонлар кенгашининг навбатдаги мажлиси бўлиб ўтди. Бу ҳақда ЎзА хабар бермоқда.
Унда икки мамлакатнинг ташқи иқтисодий алоқалар, савдо, инвестиция, банк-молия, қурилиш материаллари, қишлоқ хўжалиги машинасозлиги, автомобиль, кимё, электротехника саноати, банк сектори, туризм, хизмат кўрсатиш каби соҳалар учун масъул вазирлик ва идоралари, компания ва концернлари вакиллари иштирок этди.
Ўзбекистон бош вазири А.Арипов, Германия—Ўзбекистон ишбилармонлар кенгаши ҳамраиси, Knauf Gips KG компанияси ижрочи директори М.Грундке ва бошқалар мамлакатлар ўртасидаги ҳамкорлик барча соҳаларда жадал ривожланиб бораётгани, иқтисодиётга хорижий инвестициялар жалб қилиш ва унинг жозибадорлигини ошириш борасидаги ишлар бунда муҳим омил бўлаётганини таъкидлади.
Бугунги кунда Ўзбекистонда хориж капитали иштирокида 5 мингдан ортиқ компания фаолият юритмоқда, улардан 132 таси германиялик ишбилармонлар билан ташкил этилган. Ўзбекистонда Германиянинг етакчи компаниялари билан ўзаро манфаатли ва узоқ муддатли шерикликни ривожлантиришга устувор аҳамият қаратилмоқда. Бугунги кунда мамлакатда Германиянинг MAN, Claas, Lemken, Knauf каби ўз соҳасида етакчи бўлган концерн ва корхоналари муваффақиятли фаолият юритмоқда. Siemens, Bosch, Viessmann, Humana ва кўплаб бошқа компаниялар билан биргаликда истиқболли инвестиция лойиҳалари ишлаб чиқилмоқда.
—Ўзбекистон катта иқтисодий салоҳиятга эга мамлакат, — дейди Германиянинг мамлакатдаги фавқулодда ва мухтор элчиси Гюнтер Оверфельд. – Бугунги тадбирга Германиянинг етакчи компаниялари ташриф буюрган. Мақсад — мамлакатларимиз ўртасида савдо-иқтисодий ва инвестициявий ҳамкорликни янада ривожлантириш. Тадбир доирасида Knauf компанияси Бухорода янги ишлаб чиқариш линиясини очмоқда. Бундан ташқари, автомобилсозлик ва кимё саноатида ҳам ҳамкорликни кенгайтиришни режалаштирганмиз.
Мажлис доирасида Ўзбекистон Савдо-саноат палатаси, Ташқи савдо вазирлиги ва Инвестициялар бўйича давлат қўмитаси томонидан икки мамлакат ишбилармон доиралари вакиллари учун Ўзбекистон—Германия бизнес-форуми ва кооперацион биржа ташкил этилди.
Кооперацион биржада Ўзбекистондан қарийб 150 тадбиркор ҳамда Германиянинг 40 та йирик компанияси вакиллари иштирок этди. Унда янги қўшма корхоналар ташкил этиш, инвестиция лойиҳаларини амалга ошириш ҳамда ўзаро манфаатли шартномалар тузиш каби масалалар муҳокама қилинди.
Шу куни Германия делегацияси Тошкент шаҳрининг Чилонзор туманидаги «Алгоритм» заводида ҳам бўлди. Бу ерда Германия ишбилармонлари томонидан кичик саноат зонаси ташкил этиш режалаштирилган.
Изоҳ (0)